Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 156 Hüküm no: 105 Orijinal metin no: [15a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mühtedi Yusuf’un, kalan alacağının ödemesi talebiyle Agop’a açtığı davada; daha önce zimmet ibrası yapılmış olduğundan davanın reddedildiği Ma‘rûz Sahib-i arzuhâl Yusuf nâm mühtedî meclis-i şer‘de arzuhâlde mezkûr Yakop zimmî muvâcehesinde bundan akdem rençberlik ücretimden hâsıl eylediğim dört yüz guruşumu mezbûr Agop bi-gayr-ı hakkın ahz u kabz eylediğinden sonra meblağ-ı mezbûrun seksen guruşunu bana verip zimmetinde üç yüz yirmi guruş hakkım bâkī kalmağla taleb ederim deyü ba‘de’d-da‘vâ ve’s-suâl mezbûr Agop cevâbında müdde‘î-i mezbûr bin yüz elli beş senesi Cumâdelâhıre’sinin dokuzuncu günü târihiyle müverrah ve mahfil-i şer‘iyâtda nâibü’ş-şer‘ olan Mehmed Efendi hâtemiyle mahtûm i‘lâm-ı şer‘î mantûkunca meblağ-ı mezbûru benden da‘vâ ve an-inkâr seksen guruş bedel-i makbûza benimle sulh olup mâ‘adâsından zimmetimi ibrâ-yı âmm-ı kātı‘u’n-nizâ‘la ibrâ ve ıskāt etmişidi deyü i‘lâm-ı mezkûr ibrâzıyla eylediği def‘ini mezbûr Yusuf ikrâr ve i‘tirâf etmeğin mûcebince mezbûr Yusuf bî-vech mu‘ârazadan men‘ olunduğu Mahkeme-i Bâb’dan huzûr-ı âlîlerine i‘lâm olundu. Fî 28 Rebî‘ülâhir sene 1162