Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 157 Hüküm no: 106 Orijinal metin no: [15b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esirci Hacı Ahmed b. Mustafa’nın, Müderris Mahmud Efendi b. Mehmed Efendi’ye sattığı cariye Gürcü Şehriban’ın hür olduğunu ispat ettiğinden aldığı parayı iade etmesi Ma‘rûz Müderrisîn-i kirâmdan Mahmud Efendi b. Mehmed Efendi Bâb Mahkemesi’nde meclis-i şer‘de esirci tâifesinden Hacı Ahmed b. Mustafa muvâcehesinde târih-i i‘lâmdan dört sene mukaddem mezbûr Hacı Ahmed yedinde memlûkesi olan orta boylu kara gözlü açık kaşlı Şehriban câriyesini Gürciyyetü’l-asl olmak üzere iki yüz guruş semen-i medfû‘ ve makbûza bana bey‘ ve teslîm ben dahi ber-vech-i muharrer ba‘de’l-iştirâ ve’t-tesellüm ben dahi mevsûfe-i mezbûreyi işbu hazır bi’l-meclis Hacı Mustafa nâm kimesneye iki yüz beş guruş semen-i medfû‘ ve makbûza bey‘ ve teslîm ol dahi ber-vech-i muharrer ba‘de’l-iştirâ ve’t-tesellüm gāib ani’l-meclis Hasan Ağa nâm kimesneye iki yüz beş guruş semen-i medfû‘ ve makbûza bey‘ ve teslîm ol dahi ba‘de’l-iştirâ ve’t-tesellüm mezbûr Hasan Ağa dahi mevsûfe-i mezbûreyi Ebûbekir Beşe nâm kimesneye yüz elli guruş semen-i medfû‘ ve makbûza bey‘ ve teslîm ol dahi ber-vech-i muharrer ba‘de’l-iştirâ ve’t-tesellüm mezbûr Ebûbekir Beşe dahi mevsûfe-i mezbûreyi Esirci Abdülgani nâm kimesneye iki yüz on beş guruş semen-i medfû‘ ve makbûza bey‘ ve teslîm ol dahi ber-vech-i muharrer ba‘de’l-iştirâ ve’t-tesellüm mezbûr Hacı Abdülgani dahi mevsûfe-i mezbûreyi Kökcü İbrahim nâm kimesneye iki yüz yirmi guruş semen-i medfû‘ ve makbûza bey‘ ve teslîm ol dahi ber-vech-i muharrer iştirâ ve tesellüm eylediğinden sonra târih-i i‘lâmdan yirmi iki gün mukaddem mevsûfe-i mezbûre Şehriban Mahkeme-i Bâb’da meclis-i şer‘de mezbûr Kökcü İbrahim muvâcehesinde hürriyetini şühûd-ı udûl ile ba‘de’l-isbât ve’l-hükm sebîli tahliye olundukdan sonra mezbûr Kökcü İbrahim mezbûr Hacı Abdülgani’den ol dahi mezbûr Ebûbekir Beşe’den ol dahi mezbûr Hasan Ağa’dan ol dahi mezbûr Hacı Mustafa’dan ol dahi benden herbiri semen-i mebî‘lerini bi-hükmi’l-mürâca‘a ahz u kabz etmeleriyle ben dahi mezbûr Hacı Ahmed’den medfû‘um olup semen-i mebî‘ olan iki yüz guruşu mezbûr Hacı Ahmed’den bi-hükmi’l-mürâca‘a taleb ederim deyü da‘vâ eyledikde mezbûr Hacı Ahmed cevâbında fi’l-hakīka mevsûfe-i mezbûre Şehriban’ı iki yüz guruşa müdde‘î-i mezbûr Mahmud Efendi’ye bey‘ eylediğini ikrâr lâkin mevsûfe-i mezbûre Şehriban ber-vech-i muharrer hürriyetini isbât eylediğini inkâr edicek müdde‘î-i mezbûr Mahmud Efendi ber-vech-i muharrer müdde‘âsını Molla Hüseyin b. Hacı Mehmed ve es-Seyyid Mustafa b. Hasan nâm kimesneler şehâdetleriyle mezbûr Hacı Ahmed muvâcehesinde vech-i şer‘î üzere ba‘de’l-isbât mûcebiyle semen-i mebî‘ olan iki yüz guruşu bi-hükmi’l-mürâca‘a müdde‘î-i mezbûr Mahmud Efendi’ye edâ ve teslîme mezbûr Hacı Ahmed’e tenbîh olunduğu huzûr-ı âlîlerine i‘lâm olundu. Fî 28 Rebî‘ülâhir sene 1162