Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 158 Hüküm no: 107 Orijinal metin no: [15b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esirci Hacı Mustafa b. Ebubekir’in, Müderris Mahmud Efendi b. Mehmed Efendi’den satın aldığı Gürcü cariye Şehriban’ın hür olduğunu ispat ettiğinden parasının iadesi Ma‘rûz Esirci tâifesinden Hacı Mustafa b. Ebûbekir Bâb Mahkemesi’nde meclis-i şer‘de müderrisîn-i kirâmdan Mahmud Efendi b. Mehmed Efendi tarafından husûs-ı âti’l-beyâna vekîl olduğu Molla Hüseyin b. Mahmud ve Molla Hasan b. Abdüsselam şehâdetleriyle sâbit olan İbrahim b. Ahmed muvâcehesinde târih-i i‘lâmdan dört sene mukaddem müvekkil-i mezbûr Mahmud Efendi yedinde câriye-i memlûkesi olan orta boylu kara gözlü açık kaşlı Şehriban nâm câriyesini Gürciyyetü’l-asl olmak üzere iki yüz beş guruş semen-i medfû‘ ve makbûza bana bey‘ ve teslîm ben dahi ber-vech-i muharrer ba‘de’l-iştirâ ve’t-tesellüm ben dahi mevsûfe-i mezbûreyi gāib ani’l-meclis Hasan Ağa nâm kimesneye iki yüz beş guruş semen-i medfû‘ ve makbûza bey‘ ve teslîm ol dahi ber-vech-i muharrer ba‘de’l-iştirâ ve’t-tesellüm mezbûr Hasan Ağa dahi mevsûfe-i mezbûreyi Bekir Beşe nâm kimesneye yüz elli guruş semen-i medfû‘ ve makbûza bey‘ ve teslîm ol dahi ba‘de’l-iştirâ ve’t-tesellüm mezbûr Bekir Beşe dahi Hacı Abdülgani nâm kimesneye iki yüz on beş guruş [semen-i] medfû‘ ve makbûza bey‘ ve teslîm ol dahi ber-vech-i muharrer ba‘de’l-iştir[â] ve’t-tesellüm mezbûr Hacı Abdülgani dahi mevsûfe-i mezbûreyi Kökcü İbrahim nâm kimesneye iki yüz yirmi guruş semen-i medfû‘ ve makbûza bey‘ ve teslîm ol dahi ber-vech-i muharrer iştirâ ve tesellüm ettikden sonra târih-i i‘lâmdan yirmi bir gün mukaddem mevsûfe-i mezbûre Şehriban Mahkeme-i Bâb’da meclis-i şer‘de mezbûr Kökcü İbrahim muvâcehesinde hürriyetini şühûd-ı udûl ile ba‘de’l-isbât ve’l-hükm sebîli tahliye olundukdan sonra mezbûr Kökcü İbrahim mezbûr Hacı Abdülgani’den ol dahi mezbûr Ebûbekir Beşe’den ol dahi mezbûr Hasan Ağa’dan ol dahi benden herbiri semen-i mebî‘lerini bi-hükmi’l-mürâca‘a ahz u kabz etmeleriyle ben dahi müvekkil-i mezbûr Mahmud Efendi’ye medfû‘um olup semen-i mebî‘ olan iki yüz beş guruşu müvekkil-i mezbûr Mahmud Efendi’den bi-hükmi’l-mürâca‘a taleb ederim deyü da‘vâ eyledikde mezbûr İbrahim cevâbında fi’l-hakīka müvekkil-i mezbûr Mahmud Efendi mevsûfe-i mezbûre Şehriban’ı iki yüz beş guruşa müdde‘î-i mezbûr Hacı Mustafa’ya bey‘ eylediğini ikrâr lâkin mevsûfe-i mezbûre Şehriban ber-vech-i meşrûh hürriyetini isbât eylediğini bi’l-vekâle inkâr edicek müdde‘î-i mezbûr Hacı Mustafa ber-vech-i muharrer müdde‘âsını Molla Hüseyin b. Hacı Mehmed ve Molla Mehmed b. Ahmed nâm kimesneler şehâdetleriyle mezbûr İbrahim muvâcehesinde vech-i şer‘î üzere ba‘de’l-isbât mûcebiyle semen-i mebî‘ olan iki yüz beş guruşu bi-hükmi’l-mürâca‘a müdde‘î-i mezbûr Hacı Mustafa’ya edâ ve teslîme mezbûr İbrahim’e tenbîh olunduğu huzûr-ı âlîlerine i‘lâm olundu. Fî 26 Rebî‘ülâhir sene 1162