Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 163 Hüküm no: 114 Orijinal metin no: [16b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrailli Ali b. Seyyid Sâdık’ın varisleri hanımı Hatice bt. İbrahim ile oğlu Seyyid Mehmed’in, mûrislerinin Mehmed Efendi b. Mustafa’da alacağı olduğu iddiasıyla açtıkları davada Mehmed’in borcunu ödediğini ispat ettiği Ma‘rûz Vilâyet-i Rumeli’de medîne-i İbrail mahallâtından Yenicâmi‘ mahallesi sâkinlerinden iken bundan akdem vefât eden es-Seyyid el-Hâc Ali b. es-Seyyid Sâdık b. Abdurrahman’ın verâseti medîne-i mezkûrede sâkine zevce-i menkûha-i metrûkesi Hadîce bt. İbrahim b. Abdullah nâm hatun ile sulbî sagīr oğlu es-Seyyid Mehmed’e ba‘de’l-inhisâr sagīr-i mezbûrun vâlidesi ve tesviye-i umûruna vasîyy-i muhtârı olan mezbûre Hadîce tarafından husûs-ı âti’l-beyâna vekîl olduğu zât-ı mezbûreyi ârifân medîne-i mezbûre ahâlîsinden Mustafa b. Mehmed ve Mehmed b. Mustafa şehâdetleriyle sâbit olan es-Seyyid Ali Efendi b. es-Seyyid İbrahim Bâb Mahkemesi’nde meclis-i şer‘de Hacı Mehmed Efendi b. Mustafa muvâcehesinde bin yüz otuz bir senesinde İbrail Nezâreti Mukāta‘ası ber-vech-i mâlikâne der-uhde ve iltizâmında olan Yoğurtçuzâde Süleyman Efendi’den mezbûr Hacı Mehmed Efendi ve Kastamonulu Haseki Şişman Ahmed ile ale’l-iştirâk mâlikâne-i mezkûru iltizâm eylediklerinde mezbûr Hacı Mehmed Efendi mahmiye-i İstanbul’da müteveffâ-yı mezbûr es-Seyyid el-Hâc Ali’den hayatında karz-ı şer‘î olmak üzere beş yüz guruş ahz u kabz ve mesârifine sarfla ba‘de’l-istihlâk mezbûr es-Seyyid el-Hâc Ali meblağ-ı mezbûrun üç yüz guruşunu ahz u kabz edip iki yüz guruşu bâkī kalmağla meblağ-ı bâkī-i mezbûru kable’l-ahz ve’l-istifâ mezbûr es-Seyyid el-Hâc Ali vefât edip meblağ-ı bâkī-i mezbûr müvekkile-i mezbûre Hadîce ile sagīr-i mezbûr es-Seyyid Mehmed’e mevrûs olmağla meblağ-ı bâkī-i mezbûr iki yüz guruşu mezbûr Hacı Mehmed Efendi’den bi’l-vekâle taleb ederim deyü ba‘de’d-da‘vâ ve’s-suâl mezbûr Hacı Mehmed Efendi cevâbında fi’l-hakīka târih-i mezkûrda müteveffâ-yı mezbûr es-Seyyid el-Hâc Ali’den ber-vech-i muharrer beş yüz guruş ahz ve istihlâk eylediğini ikrâr lâkin meblağ-ı mezbûrun üç yüz guruşunu müteveffâ-yı mezbûr es-Seyyid el-Hâc Ali’ye hayatında kendiye edâ ve teslîm bâkī kalan iki yüz guruşu dahi târih-i mezkûrdan bir sene sonra mukāta‘a-i merkūmda şerîkim olan mârrü’z-zikr Ahmed’e havâle-i sahîha ile havâle eylediğimde ol dahi meblağ-ı bâkī-i mezbûr iki yüz guruşu mezbûr es-Seyyid el-Hâc Ali’ye tamamen edâ ve teslîm edip zimmetimde nesne bâkī kalmamış iken bin yüz elli iki senesinde ser-asker ta‘yîn buyrulan düstûr-ı mükerrem devletlü sa‘âdetlü Mehmed Paşa hazretlerinin sarayında medîne-i mezbûre nâibi olan Ali Efendi huzûrunda meclis-i şer‘de meblağ-ı bâkī-i mezkûr iki yüz guruşu müteveffâ-yı mezbûr es-Seyyid el-Hâc Ali hayatında bir def‘a dahi benden ba‘de’d-da‘vâ ben dahi ber-vech-i meşrûh bi-tarîkı’l-havâle kendiye edâ ve teslîm eylediğimi şühûd-ı udûl ile mezbûr es-Seyyid el-Hâc Ali muvâcehesinde [17a] ba‘de’l-isbât bî-vech mu‘ârazadan men‘ olunmuşidi deyü min-külli’l-vücûh takrîr-i meşrûhuna mutâbık nâib-i mezkûr Ali Efendi imzâsıyla mümzâ ve hâtemi ile mahtûm bir kıt‘a hüccet-i şer‘iye ibrâz ile ba‘de’d-def‘ ve’l-inkâr mezbûr Hacı Mehmed Efendi ber-vech-i muharrer mazmûn-ı hüccet-i mezkûr ile def‘ini udûl-i ahrâr-ı ricâl-i Müslimînden Mehmed Efendi b. Hüseyin ve İsmail Çelebi b. Hasan şehâdetleriyle mezbûr es-Seyyid Ali Efendi muvâcehesinde vech-i şer‘î üzere isbât etmeğin mûcebiyle vekîl-i mezbûr es-Seyyid Ali Efendi bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 4 Cumâdelûlâ sene 1162