Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 164 Hüküm no: 115 Orijinal metin no: [17a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çörekçi Halil Beşe b. Halil ile Muharrem b. Seyyid Mustafa’nın münavebe suretiyle işlettikleri çörekçi fırınını işletme sırası gelen Halil Beşe’nin işletmesi Ma‘rûz Çörekçi tâifesinden Halil Beşe b. Halil meclis-i şer‘de yine tâife-i mezbûreden es-Seyyid el-Hâc Muharrem b. es-Seyyid Mustafa muvâcehesinde mahmiye-i İstanbul’da Parmakkapı dâhilinde vâki‘ ma‘lûmü’l-hudûd çörekçi fırını derûnunda mevcûd âlât-ı ma‘lûmenin nısf-ı şâyi‘i benim ve nısf-ı âharı işbu mezbûr es-Seyyid el-Hâc Muharrem’in olup ve bundan akdem bin yüz elli dokuz senesi Cumâdelûlâ’sından işbu yedimde olup ol târihde İstanbul kādısı Bâb nâibi müderrisîn-i kirâmdan Abdülbaki Efendi imzâsıyla mümzât hüccet-i şer‘iye mûcebince âlât-ı mevcûde-i ma‘lûmeyi bir sene mezbûr isti‘mâl edip ve bir sene dahi ben isti‘mâl etmek üzere müsâneheten bi’t-terâzî mühâya ve târih-i mezbûrdan altmış senesi Cumâdelûlâ’sına gelince mezbûr es-Seyyid el-Hâc Muharrem isti‘mâl edip ba‘dehû altmış bir Cumâdelûlâ’sına değin ben müstakillen isti‘mâl edip ba‘dehû işbu altmış iki Cumâdelûlâ’sına gelince yine mezbûr müstakillen isti‘mâl edip el-hâletü hâzihî nevbet-i tasarruf bana gelmekle mezbûr es-Seyyid el-Hâc Muharrem’den fırın-ı mezkûru âlât-ı ma‘lûmesiyle bana teslîmini taleb ederim deyü ba‘de’d-da‘vâ ve’s-suâl mezbûr es-Seyyid el-Hâc Muharrem âlât-ı mezkûrenin nısfı müdde‘î-i mezbûrun mülkü olduğunu ikrâr lâkin ber-minvâl-i muharrer müsâneheten muhâyâyı inkâr etmeğin merkūm Halil ber-minvâl-i muharrer müdde‘âsını şühûd-ı udûl ile ba‘de’l-isbât mûcebince fırın-ı mezkûru âlât-ı ma‘lûmesiyle müstakillen merkūm Halil’e teslîme mezbûr es-Seyyid el-Hâc Muharrem’e tenbîh olunduğu huzûr-ı âlîlerine i‘lâm olundu. Fî 5 Cumâdelûlâ sene 1162