Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 165 Hüküm no: 117 Orijinal metin no: [17a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Fâtıma bt. İsmail’in, Emine bt. Ahmed’e kabul ettiği miktardaki borcunu ödemesi; ispat edemediği miktarın ödenmesi talebinin ise reddedildiği Ma‘rûz Zâtı ta‘rîf-i şer‘î ile mu‘arrefe olan sahibe-i arzuhâl Emine bt. Ahmed nâm hatun meclis-i şer‘de derûn-ı arzuhâlde mezkûreti’l-ism olup kezâlik zâtı ta‘rîf-i şer‘î ile mu‘arrefe olan Şerife Fâtıma bt. İsmail nâm hatun muvâcehesinde târih-i i‘lâmdan bir buçuk sene mukaddem yedimden iştirâ ve kabz eylediği eşyâ-i memlûkemden iki havlu makrame ve iki kahve makramesi ve iki aş makramesi ve yedi yağlık ve dört uçkur semenlerinden seksen beş guruş hakkımın yirmi iki guruşunu mezbûre Şerife Fâtıma yedinden ba‘de’l-ahz ve’l-kabz altmış üç guruş hakkım zimmetinde bâkī kalmağla taleb ederim deyü da‘vâ eyledikde mezbûre Şerife Fâtıma Hatun cevâbında kabzını mu‘terife olduğu meblağ-ı mezkûrdan mâ‘adâ ancak zimmetinde dokuz buçuk guruş deyni olduğunu ikrâr mâ‘adâyı inkâr etmeğin müdde‘iye-i mezbûre ber-vech-i muharrer müdde‘âsını beyâna kādire olamayıp talebiyle mezbûre Şerife Fâtıma’ya vech-i şer‘î üzere yemîn verilip mûcebiyle ikrârı olan dokuz buçuk guruşu müdde‘iye-i mezbûre Emine Hatun’a edâ ve teslîme mezbûre Şerife Fâtıma’ya ba‘de’t-tenbîh mâ‘adâ elli üç buçuk guruş mutâlebesinden müdde‘iye-i mezbûre Emine Hatun bilâ-beyyine bî-vech mu‘ârazadan men‘ olunduğu Bâb’dan huzûr-ı âlîlerine i‘lâm olundu. Fî 7 min-Cumâdelûlâ sene 1162