Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 169 Hüküm no: 123 Orijinal metin no: [18a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aşçı Panvazi’nin, ekmeğini sattığı Mirahur fırını ustası Sahak’dan her yüz akçede altı akçe alabileceği Bâ-mühr-i hazret-i efendi ekmekçiyân Ma‘rûz Sahib-i arzuhâl işkenbe çorbası tabh eden aşçı tâifesinden Panvazi nâm zimmî meclis-i şer‘de habbâz tâifesinden Mirâhur Fırını ustası Sahak zimmî muvâcehesinde habbâzlar kethudâsı ve yiğitbaşıları ve ustalarından yirmi neferden mütecâviz Müslim ve zimmî ustalar hazır oldukları hâlde ben dükkânımda fırın-ı mezkûrun ez-kadîm iskemlesi olup dükkânım civârında olan iskemleden nân-ı azîz alıp müşterilerime bey‘ edip ber-vech-i meşrûh dükkânımda bey‘ eylediğim nân-ı azîz için her yüz akçede on akçe ondalık ta‘bîr olunan ücretimi mezbûrdan taleb eylediğimde edâda ta‘allül eder deyü ba‘de’d-da‘vâ ve’s-suâl mesfûr cevâbında bizim fırınlarımızdan nân-ı azîz alıp dükkânlarında kendi metâ‘larıyla ma‘an bey‘ eden aşçı ve kebabcı ve helvâcı tâifelerine bey‘ eyledikleri nân-ı azîz için her yüz akçede altı akçe verilmek üzere ez-kadîm nizâmımız olup binâenaleyh mesfûra altı akçe veririm deyü takrîr-i meşrûhuna mutâbık senedât-ı mer‘iyye ve emr-i âlî ibrâz ve bi’l-cümle kethudâları ve ustaları dahi nizâm-ı kadîmleri minvâl-i muharrer üzere olduğunu ihbâr etmeleriyle hilâf-ı nizâm-ı kadîm ve mugāyir-i emr-i âlî her yüz akçede altı akçeden ziyâde talebinden mersûm Aşçı Panvazi zimmî men‘ olunduğu huzûr-ı âlîlerine i‘lâm olundu. Fî 7 Cumâdelûlâ sene 1162