Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 170 Hüküm no: 125 Orijinal metin no: [18a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Ahmed’in mehir ve eşya bedelinden alacağı olduğu iddiasıyla boşandığı kocası Hasan’a açtığı davada haksız bulunduğu Ma‘rûz Muhzır Yusuf mübâşeretiyle Bâb Mahkemesi’ne ihzâr olunan Hasan’ın hasmı ve zevce-i mutallakası Fâtıma bt. Ahmed nâm hatun zâtı ba‘de’t-ta‘rîf-i şer‘î meclis-i şer‘-i hatîrde mezbûr Hasan mahzarında mezbûr Hasan zevcim olup târih-i i‘lâmdan iki sene mukaddem beni tatlîk etmekle zimmetinde mütekarrer ve ma‘kūdün-aleyh olan altmış bir guruş seksen akçe mehr-i müeccelim ile ber-mûceb-i defter-i müfredât yirmi beş guruş kıymetli eşyâ-i ma‘lûmem yed ve zimmetinde kalmağla hâlâ taleb ederim deyü ba‘de’d-da‘vâ ve’s-suâl mezbûr Hasan cevâbında müdde‘iye-i mezbûre Fâtıma Hatun ber-vech-i muharrer ol mikdâr mehr-i müeccel tesmiyesiyle zevce-i medhûlün-bihâsı iken târih-i mezkûrda mufârakatlarını ikrâr lâkin müdde‘iye-i mezbûrenin benimle mufârakat-ı mezkûresi benim zimmetimde olan mehr-i müeccel-i mezkûru ve nafaka-i iddet-i ma‘lûmesi üzerlerine ve meûnet-i süknâsı dahi kendi üzerine olmak üzere bi-tarîkı’l-muhâla‘a olup hukūk-ı zevciyete ve târih-i muhâla‘aya gelince sâir beynlerinde olan ahz u i‘tâya müte‘allika âmme-i da‘vâdan benim zimmetimi ibrâ ve ıskāt etmişidi deyü mazmûnu min-külli’l-vücûh takrîr-i meşrûhuna mutâbık bir kıt‘a hüccet-i şer‘iye ibrâz ile ba‘de’d-def‘ ve’l-inkâr mezbûr Hasan def‘-i mezkûrunu ahrâr-ı ricâl-i Müslimînden lede’t-tezkiye adâletleri zâhir olan zeyl-i hüccetde isimleri mezkûr Ali Çelebi b. Abdullah ve Yusuf b. Abdullah şehâdetleriyle müdde‘iye-i mezbûre Fâtıma Hatun muvâcehesinde vech-i şer‘î üzere ba‘de’l-isbât ve’l-kabûl mûcebiyle müdde‘iye-i mezbûre Fâtıma Hatun da‘vâ-yı mezkûresiyle zevc-i sâbık-ı muhâlı‘ı Hasan’a bî-vech-i şer‘î mu‘ârazadan men‘ olundu huzûr-ı âlîlerine i‘lâm olundu. Fî 8 Ca sene 1162