Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 171 Hüküm no: 126 Orijinal metin no: [18b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yakub Ağa Hamamı Vakfı’na ait evlerin atık sularının, hamamın atık su kanalına icrası için yapılacak kanalların inşasının vakfın mütevellisi Hacı İsmail Ağa tarafından yapılması Bâ-mühr-i hazret-i efendi Ma‘rûz Fermân-ı âlîlerine imtisâlen husûs-ı âti’l-beyânı mahâllinde ketb ü tahrîr için savb-ı şer‘den ta‘yîn olunan keşif nâibimiz müderrisîn-i kirâmdan Ruhi Mustafa Efendi dâ‘îleri mahâll-i nizâ‘a varıp cerîdede mastûrü’l-esâmî Müslimîn huzûrunda akd eylediği meclis-i şer‘de Bâbüssa‘âdeti’ş-şerîfe ağası taht-ı nezâretinde olan evkāfdan derûnda mezkûr merhûm Yakub Ağa Hamamı Vakfı mütevellîsi el-Hâc İsmail Ağa ve sâir hademe-i vakf ve hamam-ı mezbûr müste’ciri es-Seyyid Ebûbekir Ağa taleb ve iltimâsları ve madde-i nizâ‘a mübâşir ta‘yîn olunan Bevvâb-ı sultânî Mehmed Ağa mübâşeretiyle hamam-ı mezbûrun kadîmî cereyân eden suyolu bacaları bulunan vakıf menziller mutasarrıfları ve zikri âtî kâriz ashâbından Zaharya v. Avakim ve Agop v. Melkon ve Papa Pedros v. Kosta ve Sırmakeş Maksud v. Avanis ve Papa Patniyus v. Madros ve Firuz v. Pedros ve Margos v. Kogas ve Nevruz v. Marat ve Papa Serkiz v. Papa Norsis ve Papa Asvador v. Norsis ve Elmas Nasrâniye v. Kiragos ve Serkiz v. Bağdasar ve Artin v. Kabril ve Firuz v. Pedros nâm zimmîler ihzâr ve menâzil-i mezbûre vakfı mütevellîleri tarafından li-ecli’l-maslaha kāimmakām nasb olunan Mehmed b. Mehmed hazır bi’l-meclis olduğu hâlde mahalleleri imâmı ve cemâ‘ati muvâcehelerinde herbirine zikrolunan bacalara hîn-i iktizâda duhûl ve tathîrine mümâna‘at olunmamak için ba‘de’t-tenbîh menâzil-i mezkûre mutasarrıfları zimmiyûn-ı mesfûrûn ile hamam-ı merkūmun suyolu mecrâsında vâki‘ ve ittisâllerinde olan Koyunemini sarayından cârî kârizlerinin sâlifü’l-beyân Yakub Ağa Hamamı Vakfı ile kıdem ve hudûs da‘vâsına müte‘allik bu def‘a zuhûr eden nizâ‘ları mütemâdî ve her tarafın yedinde âharın müdde‘âsına mugāyir bir senedi olmağın tavassut-ı muslihîn ile bâ-ma‘rifet-i mütevellî her hâneden vakf-ı mezbûra senevî altmışar akçe mukāta‘a vermek üzere münâza‘un-fîh olan kârizlerinin hamam-ı mezbûr kârizine ilhâk olunması vakfa enfa‘ ve kat‘-ı nizâ‘a evfak olmağın zimmiyûn-ı mezbûrûn kâriz-i merkūmlarını mecrâ-yı sâbıkından sarf ve müceddeden hafr olunacak kâriz tarîkını menzillerinin müctemi‘ olan Üçyol ağzından Kemer sokağının yokuş başına dek kendileri îsâl ve ondan aşağı avratlar hamamı hizâsında asıl kârize taraf-ı vakfdan idhâl olunmak münâsib görülmeğin mi‘mârân-ı hâssadan Hüseyin Halîfe ihbârıyla iktizâ eden tûlen yüz seksen beş zirâ‘ ve kadden bir zirâ‘ ve arzen on sekiz parmak tabanı tuğla ve tarafeyni kârgir duvar ve üstü taş kapaklı lağım-ı cedîdin her zirâ‘ı ikişer yüz akçeden otuz yedi bin akçe ve ücret-i amele ve levâzım-ı sâire otuz üç bin akçe ki cem‘an yetmiş bin akçeyi lağım-ı mezbûr binâsına harc ve sarf ve mârrü’z-zikr mukāta‘at-ı cedîdeden istifâ etmek için re’y-i hâkimü’ş-şer‘ ile mütevellî-i mezbûr İsmail Ağa hamamı mezkûr es-Seyyid Ebûbekir Ağa’yı tarafından tevkîl edip ol dahi ba‘de’l-kabûl meblağ-ı mezbûru malından bi-şarti’r-rücû‘ mühimme-i mezbûreye sarfa ta‘ahhüd etmeğin mâ-beynleri ıslâh ve irzâ ve kat‘-ı nizâ‘ ve mâ-cerâ olunduğunu mevlânâ-yı mûmâ-ileyh mahâllinde ketb ü tahrîr ve ma‘an ba‘s olunan ümenâ-yı şer‘le gelip alâ-vukū‘ihî inhâ ve takrîr eylediği huzûr-ı âlîlerine i‘lâm olundu. Fî 4 min-Cumâdelûlâ sene 1162