Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 172 Hüküm no: 127 Orijinal metin no: [18b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Mehmed’in, kardeşi Mehmed Çavuş’un ölmeden önce tasarrufundaki vakıf evi kendisine bedelsiz olarak sattığı iddiasıyla açtığı davada haksız bulunduğu Bâ-mühr-i hazret-i efendi Ma‘rûz Sahib-i arzuhâl Ahmed b. Mehmed nâm kimesne meclis-i şer‘de karındaşı olup tarîk-ı hâcc-ı şerîfde bundan akdem fevt olan Mehmed Çavuş b. Mehmed’in sulbî sagīr oğlu Mehmed’in bâ-hüccet-i şer‘iye vasîsi olup zikri âtî vakıf menzile bi’l-vesâye vaz‘-ı yedi mütehakkık olan Ahmed Çavuş b. Ali muvâcehesinde menzil-i mezkûrun mütevellîsi Seydi Bey mahallesi imâmı İbrahim Efendi hazır olduğu hâlde karındaşım müteveffâ-yı mezbûr hâcc-ı şerîfe azîmetinden mukaddem mahalle-i mezkûrede vâki‘ gallesi mahalle-i mezkûre imâmına meşrûta bi’l-icâreteyn tasarrufunda vakıf menzili ben diyâr-ı âharda iken gıyâbımda bilâ-bedel bana ferâğ eylemiş el-hâletü hâzihî ferâğ-ı mezbûr ma‘lûmum olduğuna binâen menzil-i mezkûra vaz‘-ı yed murâd eylediğimde vasîyy-i mezbûr menzil-i merkūm müteveffâ-yı mezbûrdan sulbî sagīr oğluna intikāl etmişdir deyü bi’l-vesâye vaz‘-ı yed edip bana teslîmden imtinâ‘ eder kasr-ı yedine tenbîh olunmak matlûbumdur deyü tesâddî eylediği da‘vâsı takrîri üzere meşrû‘â olmamağla mezbûr Ahmed bî-vech mu‘ârazadan ba‘de’l-men‘ menzil-i mezkûrun müteveffâ-yı merkūmdan sulbî sagīr oğlu Mehmed’e intikālini tahrîr için mütevellî-i mezbûra tenbîh olunduğu huzûr-ı âlîlerine i‘lâm olundu bâkī fermân hazret-i veliyyü’l-emrindir. Fî 10 Cumâdelûlâ sene 1162