Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 173 Hüküm no: 129 Orijinal metin no: [19a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un, kendisine ölünceye kadar bakmak şartıyla kocası Mustafa’ya ferağ ettiği evin ferağın hukuken geçerli olmadığından kendisine iadesi Ma‘rûz İstanbul’da Şehremîni kurbünde Cafer Ağa mahallesi sâkinelerinden olup zâtı ta‘rîf-i şer‘î ile mu‘arrefe olan Âişe Hatun Bâb Mahkemesi’nde meclis-i şer‘-i enverde zevci Mustafa mahzarında ashâb-ı hayrâtdan merhûm el-Hâc Abdurrahman Ağa Vakfı musakafâtından olup mahalle-i mezbûrede vâki‘ ma‘lûmü’l-hudûd ve’l-müştemilât bir bâb vakıf menzilimi bundan esbak zevcim mezbûr Mustafa’ya ölünce görüp gözetmek şartıyla ferâğ ve kasr-ı yed eylediğimden sonra lâkin ferâğ-ı mezkûr şart-ı mezkûre binâen fâsiddir deyü bundan akdem huzûr-ı şer‘de mezbûr Mustafa’dan ba‘de’d-da‘vâ ve’l-inkâr ben ber-vech-i muharrer müdde‘âmı mezbûr Mustafa muvâcehesinde ba‘de’l-isbât menzil-i mezkûru bâ-ma‘rifet-i mütevellî geri bana red ve teslîme mezbûr Mustafa’ya tenbîh olunup ve mûcebince bâ-ma‘rifet-i mütevellî menzil-i mezkûr kemâ-fi’l-evvel red ve zabt ve tasarrufum için işbu vakıf temessüğü dahi yedime verilmişiken mezbûr Mustafa menzil-i mezkûru bana teslîmden imtinâ‘ eder deyü ba‘de’d-da‘vâ ve’l-ikrâr mûcebince menzil-i mezkûru müdde‘iye-i mezbûre Âişe Hatun’a teslîme mezbûr Mustafa’ya tenbîh olunduğu huzûr-ı âlîlerine i‘lâm olundu. Fî 10 min-Cemâziyelevvel sene 1162