Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 174 Hüküm no: 130 Orijinal metin no: [19a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Hacı Abdullah’ın, üvey validesinde daha önce sulh bedeli olarak alacağı olan miktarın ödenmesi talebiyle açtığı davada tekrar sulh oldukları Ma‘rûz Sahib-i arzuhâl Mehmed b. el-Hâc Abdullah bi’t-terâzî Mahkeme-i Bâb’da meclis-i şer‘-i enverde üvey vâlidesi olup derûn-ı arzuhâlde mezkûre Âişe bt. Feyzullah nâm hatun tarafından husûs-ı âti’z-zikri tasdîka vekîl olduğu zât-ı mezbûreyi ârifân İmâm Abdülaziz Efendi b. Halil Efendi ve Müezzin Molla Mustafa b. Abdülbaki şehâdetleriyle sâbit olan Hasan b. Mustafa nâm kimesne muvâcehesinde derûn-ı arzuhâlde zikrolunduğu üzere üvey vâlidem müvekkile-i mezbûre Âişe Hatun’dan zimmetinde bedel-i sulhdan bâkī kalan beş yüz guruş hakkım da‘vâsından bâ-vesâtet-i muslihîn üvey vâlidem müvekkile-i mezbûre Âişe Hatun ile üç yüz altmış beş guruş dört para bedel-i makbûza sulh olup mâ‘adâsına müte‘allika âmme-i da‘vâdan müvekkile-i mezbûre Âişe Hatun’un zimmetini ibrâ-i âmm-ı kātı‘u’n-nizâ‘la ibrâ ve ıskāt eylediğimde ol dahi ibrâ-i mezkûru ba‘de’l-kabûl kezâlik bedel-i medfû‘una ve sâire müte‘allika âmme-i da‘vâdan benim zimmetimi ibrâ ve ıskāt eyledi deyü olan ikrârını vekîl-i mezbûrun tasdîk eylediği huzûr-ı âlîlerine i‘lâm olundu. Fî 11 Cumâdelûlâ sene 1162