Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 174 Hüküm no: 131 Orijinal metin no: [19a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hoşabcı Hasan b. Mustafa, Manav Ebubekir b. Mehmed ve kardeşi Mehmed’in, satışı bakkallara ait sade yağ, tulum peyniri ve diğer mamülleri satmaktan menedildikleri Bâ-mühr-i hazret-i efendi. Nizâm-ı bakkāl Ma‘rûz Bakkāl tâifesinden Pazarbaşı Mehmed Çelebi ve Ahmed Usta ve Molla Ahmed ve Mahmud Çelebi ve Molla Ali ve Ahmed Beşe ve zimmî ustalardan Viko ve Kaloyani ve Miho ve Kanile ve sahib-i arzuhâl Yani ve sâir Müslim ve zimmî ustalar meclis-i şer‘de hoşâbcı tâifesinden Hasan b. Mustafa ve Manav tâifesinden Ebûbekir b. Mehmed muvâcehelerinde işbu mezbûrân kendi san‘atlarına ve bey‘ ve şirâsı hirfetlerine mahsûs olan emti‘a ile kâr ve kisbe kanâ‘at etmeyip bizim esnâfımıza mahsûs olup bâ-fermân-ı âlî esnâf-ı sâire bey‘ ve şirâsından memnû‘ oldukları emti‘adan tulum peyniri ve kuru üzüm ve nârdenk ve revgan-ı zeyt ve revgan-ı sâdeyi sahib-i arzuhâlin dükkânı civârında olan hoşâbcı ve manav dükkânında mezbûr Hasan ve Ebûbekir ve karındaşı gāib ani’l-meclis Mehmed hilâf-ı nizâm-ı kadîm ve mugāyir-i emr-i âlîşân bey‘ etmeleriyle ihtilâl-i nizâmımıza bâdî olurlar deyü takrîrlerine mutâbık tuğrâ-yı garrâ ile mu‘anven emr-i âlîşân ibrâzıyla muvâcehelerinde ba‘de’t-teşekkî kıbel-i şer‘den hilâf-ı emr-i âlî hareket etmemek üzere mezbûrâna ba‘de’t-tenbîh onlar dahi ber-minvâl-i muharrer bakkāl metâ‘ını bey‘ eylediklerini inkârlarından mâ‘adâ fîmâ-ba‘d dahi bakkālara müte‘allik emti‘ayı kat‘a bey‘ ve şirâ etmeyelim deyip ber-mûceb-i emr-i âlî nizâm-ı kadîm herbiri amel ve harekete ta‘ahhüd eyledikleri ba‘de’t-tescîl huzûr-ı âlîlerine i‘lâm olundu bâkī fermân hazret-i veliyyü’l-emrindir. Fî 21 Cumâdelûlâ sene 1162