Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 176 Hüküm no: 133 Orijinal metin no: [19b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva Hatun bt. Musa’nın kendisini iki defa boşayan kocası Mehmed Emin b. Mustafa’da mehir ve diğer alacaklarına karşılık otuz kuruş üzerine sulh olduğu Ma‘rûz Derûn-ı arzuhâlde mezkûreti’l-ism olup zâtı Müezzin Hüseyin b. Hasan ve Ali Çelebi b. İbrahim ta‘rîfleriyle mu‘arrefe olan Havva Hatun bt. Musa meclis-i şer‘-i enverde zevc-i mutallıkı olup derûn-ı arzuhâlde mezkûr Mehmed Emin’in babası ve tarafından husûs-ı âti’z-zikre vekîli olduğu Müezzin Ali Çelebi b. İbrahim ve Perdeci Ali Çelebi b. el-Hâc Süleyman şehâdetleriyle sâbit olan Mustafa b. Ahmed muvâcehesinde müvekkil-i mezbûr Mehmed Emin beş bin akçe mehr-i müeccel-i müsemmâ ile zevce-i medhûlün-bihâsı iken târih-i i‘lâmdan bir sene mukaddem beni bâyinen tatlîk edip ba‘dehû iki bin akçe mehr-i müeccel tesmiyesiyle ba‘de tecdîd-i akdi’n-nikâh yine târih-i i‘lâmdan on gün mukaddem beni bâyinen tatlîk etmekle hâlâ akdeyn-i mezkûreyn ile zimmetinde müctemi‘ olan yedi bin akçe mehr-i müeccelimi ve tatlîk-ı sânîden nafaka-i iddet-i ma‘lûme ve meûnet-i süknâmı taleb ederim deyü da‘vâ ve vekîl-i mezbûr dahi bi’l-vekâle cevâbında müdde‘iye-i mezbûre müvekkili mezbûrun zevce-i medhûlün-bihâsı olup iki def‘a fırkatlerini ikrâr lâkin müvekkilim mezbûr fırkat-i ûlâda müdde‘iye-i mezkûrenin beş bin akçe mehrini müdde‘iye-i mezkûreye tamamen edâ etmişidi deyü bi’l-vekâle def‘ sadedinde olup ol vechile beynlerinde ba‘de vukū‘ı’l-münâza‘ât bâ-vesâtet-i muslihîn müdde‘iye-i mezbûre Havva Hatun zikrolunan müdde‘âlarından vekîl-i mezbûr Mustafa ile otuz guruşa sulh olup mâ‘adâsına müte‘allika da‘vâdan müvekkil-i mezbûrun zimmetini ba‘de’l-ibrâ bedel-i sulh olan meblağ-ı mezkûr otuz guruşun dahi on beş guruşunu müvekkil-i mezbûru târih-i i‘lâmdan üç gün tamamında edâ edip ve on beş guruşunu dahi beher şehr beşer guruş verip târih-i i‘lâm senesi şehr-i Ramazan-ı şerîf’inin gurresine değin tamamen ber-taksît-i mezkûr edâ etmek üzere tecîl eyledikde vekîl-i mezbûr dahi bi’l-vekâle ba‘de’l-kabûl meblağ-ı mezkûru müvekkil-i mezbûrun ber-taksît-i mezkûr edâsına bi’l-vekâle ta‘ahhüd ve iltizâm eylediği Mahkeme-i Bâb’dan huzûr-ı âlîlerine i‘lâm olundu. Fî 13 Cumâdelûlâ sene 1162