Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 178 Hüküm no: 137 Orijinal metin no: [20a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Abdurrahman’ın, daha önce Sabatay v. Sason’a sattığı çeşitli mücevherlerin satışında aldatıldığı iddiasıyla açtığı davada sulh olduğu Bâ-mühr-i hazret-i efendi Ma‘rûz Sahibe-i arzuhâl Çakır Ağa mahallesinde sâkine Fâtıma bt. Abdurrahman zâtı zevci İbrahim Çelebi ve Salih Çelebi ta‘rîfleriyle mu‘arrefe oldukdan sonra meclis-i şer‘de Sabatay v. Sason nâm Yahûdî muvâcehesinde mesfûr Sabatay’a târih-i i‘lâmdan yedi sene mukaddem yedimde mülküm olan bir çift habbe-i zümrüd küpe ve kopçaları üçer elmaslı ikişer sıra bir çift inci askımı bi-safkatin vâhidetin bin seksen guruş semen-i makbûza bey‘-ı kat‘î-i şer‘î ile bey‘ ve teslîm etmişidim el-hâletü hâzihî bey‘-ı mezkûrum tagrîr ve gabn-i fâhiş ile olmağla mebî‘-i merkūmu istirdâd ederim deyü bundan akdem mesfûr Sabatay’dan da‘vâ sadedinde olmamla beynimizde ba‘de vukū‘ı’l-münâza‘âti’l-kesîre tavassut-ı muslihûn ile da‘vâ-yı mezkûremden mesfûr Sabatay ile üç yüz guruş bedel-i makbûza sulh olup fîmâ-ba‘d bey‘-ı mezkûreme ve tagrîr ve gabnine müte‘allik âmme-i de‘âvî ve mutâlebât ve kâffe-i eymân ve muhâsamâtdan ben ve zevcim işbu İbrahim Çelebi mesfûr Sabatay’ın ve sulbî oğlu işbu hazır bi’l-meclis Sason Yahûdî’nin zimmetlerini ve onlar dahi mukaddemâ ve hâlâ bana medfû‘ları olan semen ve bedele müte‘allik âmme-i da‘vâdan benim ve zevcim mezbûrun zimmetlerimizi ibrâ-i âm ile ibrâ ve ıskāt edip herbirimiz âharın ibrâsını kabûl eyledik ba‘de’l-yevm herbirimizin âhar ile vechen mine’l-vücûh ve sebeben mine’l-esbâb kat‘a da‘vâ ve nizâ‘ ve husûmetimiz yokdur dediğini mesfûr Sabatay ve oğlu mersûm Sason Yahûdiler ve zevc-i merkūm herbiri tasdîk eylediği tescîl ve huzûr-ı âlîlerine i‘lâm olundu bâkī fermân hazret-i veliyyü’l-emrindir. Fî 15 min-Cumâdelûlâ sene 1162