Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 179 Hüküm no: 138 Orijinal metin no: [20a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm bt. Süleyman’ın birikmiş kira bedellerini Rukiye bt. Süleyman Efendi’ye ödemesi Ma‘rûz Arzuhâlde mezkûr husûsun mahâllinde istimâ‘ ve fasli’çün bi’l-iltimâs kıbel-i şer‘-i enverden me’zûnen bi’l-hükm irsâl olunan Başkâtib Ömer Efendi dâ‘îleri mahmiye-i İstanbul’da Aksaray kurbünde Çakır Ağa mahallesinde Kapıcılar kethudâsı Mustafa Ağa b. Mehmed’in menziline varıp huzûr-ı Müslimînde akd-i meclis-i şer‘-i âlî eyledikde sahibe-i arzuhâl olup zâtı zevci mûmâ-ileyh Mustafa Ağa ve İmâm Hâfız Ahmed Efendi b. İbrahim ile mu‘arrefe olan Rukiye Hatun bt. Süleyman Efendi meclis-i ma‘kūd-ı mezkûrda derûn-ı arzuhâlde mezkûre olup zâtı imâm-ı mezkûr Hâfız Ahmed Efendi ve sadrî kebîr oğlu Süleyman Beşe b. el-Hâc Hüseyin ta‘rîfleriyle mu‘arrefe olan Ümmügülsüm bt. Süleyman nâm hatun muvâcehesinde merhûme Sâliha Hatun nâm sahibetü’l-hayr vakfından mahmiye-i mezbûrede Alemî Bey mahallesinde vâki‘ benim bi’l-icâreteyn tasarrufumda olan ma‘lûmü’l-hudûd ve’l-müştemilât menzilimde mezbûre Ümmügülsüm Hatun beher şehr üçer guruş ve beşer para ücret ile müste’ciri olmağla menzil-i mezkûrem ücretinden zimmetinde yirmi dokuz aylık doksan guruş ve yirmi beş para ücret hakkım müctemi‘ olmağla taleb ederim deyü ba‘de’d-da‘vâ ve’s-suâl mezbûre Ümmügülsüm Hatun cevâbında fi’l-vâki‘ menzil-i mezkûru müdde‘iye-i mezbûreden ber-vech-i muharrer istîcâr ve zimmetinde yirmi dokuz aylık doksan guruş ve yirmi beş para ücret müctemi‘a olduğunu ikrâr ve i‘tirâf etmeğin alâ-mûceb-i i‘tirâfihâ meblağ-ı mezkûr doksan guruş ve yirmi beş para ücreti müdde‘iye-i mezbûre Rukiye Hatun’a edâ ve teslîm ile mezbûre Ümmügülsüm Hatun’a tenbîh eylediğini mahâllinde kâtib-i mezbûr ketb ü tahrîr ba‘dehû ma‘an ba‘s olunan ümenâ-i şer‘-i enver ile gelip meclis-i şer‘de inhâ eyledikde ba‘de’t-tenfîz tescîl ve huzûr-ı âlîlerine i‘lâm olundu fermân men-lehu’l-emrindir. Fî 14 Ca sene 1162