Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 180 Hüküm no: 139 Orijinal metin no: [20b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Akbıyık mahallesinde Hacı Hüseyin Ağa’nın harap durumdaki evini yıkıp eski evinin ölçülerinde yeniden inşasına izin verilmesi Bâ-mühr-i hazret-i efendi Ma‘rûz Fermân-ı âlîlerine imtisâlen husûs-ı âti’l-beyânı mahâllinde keşf ve tahrîr için savb-ı şer‘den bi’l-iltimâs ta‘yîn olunan keşif nâibimiz müderrisîn-i kirâmdan Mustafa Efendi dâ‘îleri hâssa mi‘mârlarından el-Hâc Süleyman ve es-Seyyid Mehmed halîfeler ile mahmiye-i İstanbul’da Akbıyık mahallesinde sahib-i arzuhâl el-Hâc Hüseyin Ağa’nın mutasarrıf olduğu harâba müşrif menziline varıp cerîdede mastûrü’l-esâmî imâm ve ahâlî-i mahalle ile menzil-i mezbûrun ebniye-i mevcûdesine ba‘de’n-nazar mi‘mârân-ı mezbûrân ihbârıyla zemînden irtifa‘ı kadden on altı zirâ‘ ve tarîk-ı âm üzerine mümted iki aded şehnişînlerden biri arzen bir buçuk ve biri iki zirâ‘ idiği müte‘ayyin olmağın mûmâ-ileyh el-Hâc Hüseyin Ağa zikrolunan menzil kābil-i süknâ olmamağla bi’l-külliye hedm edip sâlifü’z-zikr şehnişînler ile vaz‘-ı kadîm ve i[r]tifâ‘-ı aslîsi üzere müceddeden binâ için emr-i âlî ricâ eylediği mevlânâ-yı mûmâ-ileyh inhâsıyla huzûr-ı âlîlerine i‘lâm olundu. Fî 6 min-Cumâdelûlâ sene 1162