Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 180 Hüküm no: 140 Orijinal metin no: [20b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid İbrahim b. Seyyid Mustafa’nın, tasarruf sırası kendisinde olduğu halde Derviş Kaptanzade Ayşe Hatun’un vakfı olan arsa, hamam, fırın ve matbahı zaptettiği iddiasıyla Şerife Hacı Hatice Hatun bt. Seyyid Aliye açtığı davada haksız bulunduğu Bâ-mühr-i hazret-i efendi Ma‘rûz es-Seyyid İbrahim b. es-Seyyid Mustafa nâm kimesne meclis-i şer‘de zikri âtî arsa ve hamam ve mahzen ve fırın ve taş odaya vâzı‘atü’l-yed olduğu mütehakkık olan Şerife Hâcce Hadîce Hatun bt. es-Seyyid Ali ile zâtı ba‘de’t-ta‘rîf terâfu‘larında işbu yedimde olan vakfiye-i ma‘mûlün-bihâ mûcebince Derviş Kapudanzâde Âişe nâm hatun bin kırk beş senesi Saferü’l-hayr’ında İstanbul’da Zeyrek kurbünde Timurhan mahallesinde vâki‘ etrafı Eslem Hatun Vakfı ve Münire Hatun ve Abdülbaki Efendi menzilleri ve tarîk-ı âm ile mahdûd beş yüz on bir zirâ‘ arsa ve hamam ve fırın ve matbahı hâvî mülk menzilini hasbeten lillâhi te‘âlâ vakıf ve habs edip gallesini evvelâ kendiye ba‘de vefâtihâ evlâdına ve evlâd-ı evlâdına ve evlâd-ı evlâdına batnen ba‘de batnin ve fer‘an gıbbe aslin ile’l-inkırâz ba‘dehûm Lankazâde demekle ma‘rûf Abdullah Bey’e ba‘dehû evlâdına ve evlâd-ı evlâd-ı evlâdına kezâlik ile’l-inkırâz ba‘dehûm icâre-i mu‘tâde ile îcâr olunup yevmî bir akçe Timurhan Mescidi imâmına verile ol dahi akīb-i salât-ı zuhûrda [zuhrda] bir Sûre-i Mülk tilâvet eyleye ve bir akçe dahi mescid-i merkūm müezzinine verile ol dahi akīb-i salât-ı asrda binâ-i tilâvet eyleye deyü şart ve ta‘yîn edip el-hâletü hâzihî menzil-i mezkûr işbu mezbûre Hâcce Şerife Hadîce Hatun’un sâkine olduğu menzil derûnunda müştemilâtından olup ve ben vâkıfe-i mezbûrenin sulbî oğlu es-Seyyid Nasuh’un sulbiye kızı Şerife Münire’nin sadrî oğlu es-Seyyid İbrahim’in sulbî oğlu es-Seyyid Mustafa’nın sulbî oğlu olup ber-mûceb-i şart-ı vâkıfe menzil-i mezkûrun galle ve tasarrufu benim hakkım iken mezbûre Hâcce Şerife Hadîce bi-gayr-ı hakkın arsa-i mezkûreye ve hamam ve mahzen ve matbaha vaz‘-ı yed eder suâl olunup kasr-ı yedine tenbîh olunmak matlûbumdur deyü ba‘de’d-da‘vâ ve’s-suâl mezbûre Hâcce Şerife Hadîce Hatun mârrü’z-zikr arsa ve hamam ve mahzen ve matbah ber-vech-i muharrer Âişe Hatun Vakfı olduğunu ve şürût-ı mezkûreyi ve kendinin vâzı‘atü’l-yed olduğunu ikrâr edip lâkin ben dahi vâkıfe-i mezbûre Âişe Hatun’un sadrî oğlu es-Seyyid Nasuh’un sulbî kızı Şerife Münire’nin sadrî oğlu es-Seyyid Ali’nin sulbiye kızı olup müdde‘î-i mezbûrdan bir batın mukaddem olmamla ber-mûceb-i şart-ı vâkıfe arsa ve hamam ve mahzen ve matbahın nevbet-i tasarrufu benim olmağla bi-hakkın tasarruf ederim deyü ba‘de’d-def‘ ve’s-suâl mezbûr es-Seyyid İbrahim merkūme Hâcce Şerife Hadîce Hatun’un ber-minvâl-i muharrer evlâd-ı vâkıfe-i mezbûreden olduğunu inkâr etmekle mezbûre Hâcce Şerife Hadîce Hatun def‘-i meşrûhunu lede’t-tezkiye adâletleri zâhir olan Başmukāta‘a halîfesi es-Seyyid Mehmed Efendi b. İbrahim ve İstanbul kalemi kîsedârı es-Seyyid Osman Efendi b. İbrahim şehâdetleriyle mezbûr es-Seyyid İbrahim muvâcehesinde vech-i şer‘î üzere ba‘de’l-isbât ve’l-hükm mûcebince müdde‘î-i mezbûr es-Seyyid İbrahim bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 13 Ca sene 1162