Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 182 Hüküm no: 142 Orijinal metin no: [21a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyrek mahallesi ahalisinin, Kapıcı Osman b. Abdullah ile hanımı Ümmühani bt. Abdullah’ın uygunsuz tavır ve hareketleri olduğundan mahallelerinden ihraç ve cezalandırılmaları talepleri Ma‘rûz Arzuhâlde mezkûr Zeyrek mahallesi imâmı Veliyüddin Efendi b. Mehmed ve ahâlîsinden el-Hâc İbrahim b. Osman ve Mehmed Odabaşı b. Hüseyin ve Teberdâr Hasan Ağa b. Mehmed ve Osman Yazıcı b. Mehmed ve Feyzullah Çelebi b. el-Hâc Ali ve Mehmed Çelebi b. Abdullah ve Mehmed Çelebi b. İbrahim ve Mustafa Beşe b. Mehmed ve el-Hâc Osman b. Ebûbekir nâm kimesneler meclis-i şer‘-i enverde derûn-ı arzuhâlde mezkûr Kapıcı Osman b. Abdullah ile zevcesi Ümmühani bt. Abdullah muvâcehelerinde mezbûrân Kapıcı Osman ve zevcesi Ümmühani öteden beri kendi hâllerinde olmayıp menzillerine ecnebi ve nâ-mahrem kimesneler getirip kat‘a muharremâtdan ictinâbları olmamağla nush ve men‘leri sadedinde olduğumuzda herbirimizi ta‘zîri mûceb elfâz-ı şenî‘a ile şetm ve ırzlarımızı hetk etmekle mezbûre Ümmühani ve zevcinden bir vechile emn ü râhatımız yokdur deyü teşekkî ve mezbûre Ümmühani ile zevci mezbûru mahalleden ihrâc ile ta‘zîr olunmaları ricâsında oldukları Mahkeme-i Bâb’dan huzûr-ı âlîlerine i‘lâm olundu. Fî 17 Ca sene 1162