Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 183 Hüküm no: 144 Orijinal metin no: [21a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Trabzon ahalisinden Aleksandıra v. Atam’a borcu olan Lefter v. Yani’nin borcunu Aleksandıra’nın kardeşi Papa Sofron’a ödemesi Ma‘rûz Anadolu’da medîne-i Trabzon mahallâtından Eksohte mahallesi ahâlîsinden olup İstanbul’da Şişeciler Hanı’nda müsâfereten mütemekkin iken hâlik olan Aleksandıra v. Atam zimmînin verâseti mârrü’z-zikr Eksohte mahallesinde mütemekkinler anası Marta bt. Yorgi ve li-ebeveyn er karındaşı İlya ve İstanbul’da Balat Kilisesi’nde mütemekkin Papa Sofron zimmîlere ba‘de tahakkukı’l-inhisâr mesfûr Papa Sofron kendiden asâleten ve anası Marta ve karındaşı İlya zimmîler taraflarından hâlik-i mesfûrun terekesine vâzı‘u’l-yed olanlardan hisse-i irsiyelerini taleb ve da‘vâ ve ahz u kabz ve lede’l-iktizâ sulh ve ibrâ ve bedel-i sulhu ahz u kabz ve hisse-i irsiyelerinden makbûzâtını kendilere îsâl ve teslîme ve bunların mütevakkıf olduğu umûrun küllîsine taraflarından vekîlleri olduğu lede’ş-şer‘i’l-enver mazmûnu sâbit hüccet-i şer‘iye ile sâbit ve sübût-ı vekâleti mahkûmun-bih olmağla vekâleten meclis-i şer‘-i enverde sahib-i arzuhâl Lefter v. Yani zimmî muvâcehesinde karındaşım hâlik-i mesfûrun işbu merkūm Lefter zimmetinde cihet-i karzdan yüz elli guruş hakkı olup kable’l-ahz ve’l-istifâ hâlik olmağla zimmetinde kalıp ve hatta merkūm Lefter dahi târih-i i‘lâmdan dört gün mukaddem meblağ-ı mezbûrun karındaşım hâlik-i mesfûra zimmetinde deyni olduğunu alâ-re’si’l-işhâd ikrâr ve işhâd dahi etmekle asâleten ve vekâleten taleb ederim deyü ba‘de’d-da‘vâ ve’l-inkâr müdde‘î-i mesfûr Papa Sofron asâleten ve vekâleten müdde‘âsını ahrâr-ı ricâl-i ehl-i zimmetden Apostol v. Dimitri ve Kostantin v. Anderi nâm zimmîler şehâdetleriyle isbât eyledikde merkūm Lefter zimmî dahi hâlâ meblağ-ı müdde‘â-yı mezkûr yüz elli guruş zimmetinde hâlik-i mesfûra deyni olduğunu tâyi‘an ikrâr dahi etmeğin mûcebiyle meblağ-ı mezkûr yüz elli guruşu asâleten ve vekâleten müdde‘î-i mesfûr Papa Sofron zimmîye edâ ve teslîmle merkūm Lefter zimmîye tenbîh olunduğu Bâb’dan huzûr-ı âlîlerine i‘lâm olundu. Fî 18 Cumâdelûlâ sene 1162