Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 184 Hüküm no: 146 Orijinal metin no: [21b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bekçi Ali b. Hasan’ın, Bekçi Seyyid Murtaza’da alacağı olduğu iddiasıyla açtığı davada Murtaza’nın para karşılığında bir kılıç verdiğini ispat etmesiyle davanın reddedildiği Ma‘rûz İstanbul’da mahallât bekçisi tâifesinden Ali b. Hasan meclis-i şer‘de yine tâife-i mezkûreden es-Seyyid Murtaza b. es-Seyyid Mehmed muvâcehesinde târih-i i‘lâmdan iki sene mukaddem mezbûr es-Seyyid Murtaza vilâyetine gider olduğunda Şeyhzâdebaşı’nda vâki‘ Kapamacılar çarşısının bekçiliğine beni vaz‘ etmekle mezbûr es-Seyyid Murtaza gedik bahâ olmak üzere benim yirmi guruşumu ahz u kabz etmekle meblağ-ı mezbûru mezbûr es-Seyyid Murtaza’dan taleb ederim deyü da‘vâ eyledikde ol dahi kazıyye minvâl-i muharrer üzere olduğunu ikrâr lâkin târih-i mezkûrda meblağ-ı mezkûr yirmi guruş mukābelesinde müdde‘î-i mezbûr Ali’ye bir kılıç def‘ ve teslîm ol dahi ber-vech-i muharrer ba‘de’l-ahz ve’l-kabz meblağ-ı mezkûra müte‘allika âmme-i da‘vâdan mezbûr Ali benim zimmetimi ibrâ eyledi deyü ba‘de’d-def‘ ve’l-inkâr mezbûr es-Seyyid Murtaza’dan vech-i meşrûh üzere def‘-i mezkûrunu mezbûr Ali muvâcehesinde yine bekçi tâifelerinden Ebûbekir b. Ali ve Hamza b. Veliyüddin şehâdetleriyle vech-i şer‘î üzere isbât etmeğin mûcebiyle mezbûr Ali da‘vâ-yı mezkûresiyle mezbûr es-Seyyid Murtaza’ya bî-vech mu‘ârazadan men‘ olunduğu Bâb’dan huzûr-ı âlîlerine i‘lâm olundu. Fî 20 min-Cumâdelûlâ sene 1162