Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 185 Hüküm no: 147 Orijinal metin no: [21b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Balcı mahallesi müezzinine meşruta menzilde Mehmed b. İbrahim ile kardeşi İbrahim b. Halil’in iki sene süreyle münavebe suretiyle oturmak üzere anlaştıkları Ma‘rûz İstanbul’da Balcı mahallesinde vâki‘ gallesi mahalle-i mezkûre müezzinine meşrûta ma‘lûmü’l-hudûd menzile li-ümmin er karındaşı Mehmed b. İbrahim ile bi’l-iştirâki’s-seviy icâreteyn ile mutasarrıf olan İbrahim b. Halil meclis-i şer‘de şerîki mezbûr Mehmed muvâcehesinde mezbûr Mehmed mukaddemâ menzil-i mahdûd-ı mezkûrda iki sene sâkin olmağla hâlâ mezbûr Mehmed menzil-i mezkûrdan hurûc ve bi-tarîkı’t-tehâyü’ iki sene dahi benim sâkin olmama mezbûr Mehmed râzı olup bu vechile fîmâ-ba‘d herbirimiz tehâyüen sâkin olmağa ta‘ahhüd eyledik deyü mezbûr İbrahim’in olan takrîrini mezbûr Mehmed’in tasdîk eylediği Bâb Mahkemesi’nden huzûr-ı âlîlerine i‘lâm olundu. Fî 20 min-Cumâdelûlâ sene 1162