Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 185 Hüküm no: 148 Orijinal metin no: [21b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb bt. Abdullah’ın, daha önce evindeki eşyalarını emanet olarak alan Müezzin Feyzullah’dan eşyalarını geri aldığı Ma‘rûz Zikr-i âtî husûsun mahâllinde ketb ü tahrîri için bi’t-taleb Mahkeme-i Bâb’dan irsâl olunan Mevlânâ Feyzullah Efendi İstanbul’da Sarı Bâyezid Câmi‘-i şerîfi’ne varıp ba‘de akdi’l-meclis zâtı mahalle-i mezbûre imâmı Hüseyin Efendi b. Mehmed ve es-Seyyid Mehmed b. Mehmed ta‘rîfleriyle mu‘arrefe olan sahibe-i arzuhâl Zeyneb bt. Abdullah nâm hatun meclis-i ma‘kūd-ı mezkûrede mahalle-i mezbûre müezzini es-Seyyid Feyzullah Halîfe muvâcehesinde târih-i i‘lâmdan kırk iki gün mukaddem beni hâzıra değil iken mahalle-i mezbûrede sâkine olduğum menzilde mevcûd eşyâ-i memlûkemi bi’l-iktizâ bâ-fermân-ı âlî ma‘rifet-i şer‘le tahrîr ve müezzin-i mezbûr es-Seyyid Feyzullah Halîfe’ye kıbel-i şer‘-i enverden mümzâ ve mahtûm defter mantûkunca müezzin-i mezbûr es-Seyyid Feyzullah Halîfe’ye bi’l-emâne def‘ ve teslîm etmişler idi hâlâ işbu akd olunan meclis-i şer‘de defter-i mezkûr nâtık olduğu üzere eşyâ-i mezkûremi mezbûr es-Seyyid Feyzullah Halîfe bana def‘ ve teslîm ben dahi ber-vech-i muharrer yedinden tamamen ahz u kabz eyledim müezzin-i mezbûr es-Seyyid Feyzullah Halîfe yedinde ve kıbelinde eşyâ-i mezkûremden kat‘a bir nesnem bâkī kalmadı dediğini mevlânâ-yı mezbûr mahâllinde ba‘de’t-tahrîr ümenâ-i şer‘le meclis-i şer‘a gelip alâ-vukū‘ihî inhâ ve takrîr eyledikleri huzûr-ı âlîlerine i‘lâm olundu el-emrü li-men-lehu’l-emr. Fî 19 min-Cumâdelûlâ sene 1162