Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 186 Hüküm no: 150 Orijinal metin no: [21b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mumcu Yani v. Angeli’nin, vefat eden Apostol v. Angeli’de olan alacağının terekeden ödenmesi Ma‘rûz Mumcu tâifesinden Yani v. Angeli zimmî meclis-i şer‘-i enverde yine tâife-i merkūmeden olup mukaddemâ katîlen hâlik olan Apostol v. Angeli zimmînin sulbî kebîr oğlu Kostantin zimmî muvâcehesinde hâlik-i mesfûra hayatında târih-i i‘lâmdan üç sene mukaddem malımdan yirmi iki guruş ikrâz ve teslîm ol dahi iktirâz ve yedimden ahz u kabz ve istihlâk edip kable’l-edâ ve’l-îfâ hâlik olmağla hâlâ oğlu mesfûrdan suâl ve tereke-i vâfiyesinden bana edâsına tenbîh taleb ederim deyü ba‘de’d-da‘vâ ve’l-inkâr müdde‘î-i mesfûr Yani zimmî müdde‘âsını ahrâr-ı ricâl-i ehl-i zimmetden mumcu tâifesinden lede’t-tezkiye şehâdetleri makbûle olan Panayot v. Dimitri ve Aleksi v. Şego zimmîler şehâdetleriyle merkūm Kostantin muvâcehesinde vech-i şer‘î üzere ba‘de’l-isbât ve’l-kabûl müdde‘î-i merkūm dahi meblağ-ı mezbûru hayatında hâlik-i mesfûrdan ahz ve istifâ etmediğine tahlîf-i şer‘î olunmağla mûcebiyle hükmolunup meblağ-ı mezkûr yirmi iki guruşu hâlik-i mesfûrun tereke-i vâfiyesinden müdde‘î-i merkūma edâ ve teslîmle merkūm Kostantin zimmîye tenbîh olunduğu Mahkeme-i Bâb’dan huzûr-ı âlîlerine i‘lâm olundu fermân men-lehu’l-emrindir. Fî 21 Cumâdelûlâ sene 1162