Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 187 Hüküm no: 151 Orijinal metin no: [22a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mustafa Ağa b. Hasan’ın cariyesi olup varisleri Havva Hatun bt. Salih Ağa ile oğlu Mustafa’ya intikal eden Yeter’in hürriyetini ispat ettiğinden serbest bırakıldığı Ma‘rûz Orta boylu açık kara kaşlı kara gözlü Yeter nâm-ı diğer Tûtî nâm Müslime avrat meclis-i şer‘-i enverde kendiye rakīkası olmak üzere vâzı‘u’l-yed iken bundan akdem vefât eden Mustafa Ağa b. Hasan’ın zevce-i menkûha-i metrûkesi olup zâtı Mustafa Beşe b. Mehmed ve Hüseyin Beşe b. Receb ta‘rîfleriyle mu‘arrefe olan Havva Hatun bt. Salih Ağa muvâcehesinde ben vilâyet-i Anadolu’da Kars kazâsına tâbi‘ Karakale nâm karye ahâlîsinden hürrü’l-asl Müslim olan Mahmud b. Abdullah nâm kimesnenin firâş-ı sahîhinden hâsıla ve hürretü’l-asl Müslime olan zevce-i menkûhası Nefise bt. Hızır nâm hatundan mütevellide olup ebevânım mezbûrândan birine rık târî olmamış hürretü’l-asl iken mezbûre Havva Hatun tereke-i müteveffâ-yı mezbûrdan rakīka-i mevrûsesi olmak üzere bana bi-gayr-ı hakkın vaz‘-ı yed eder üzerimden yed-i âdiyeleri ref‘ ve sebîlim tahliyesiyle tenbîh olunmasını taleb ederim deyü ba‘de’d-da‘vâ ve’s-suâl mezbûre Havva Hatun cevâbında fi’l-vâki‘ müdde‘iye-i mevsûfe-i mezkûreye zevci ve mûrisi müteveffâ-yı mezbûr Mustafa Ağa hayatında medîne-i Kefe’de esir dellâlı olan Serdengeçdi ağası Rizeli Mehmed Ağa delâletiyle Kefe ahâlîsinden Kör Ârif nâm esirciden yedinde Gürciyyetü’l-asl câriye-i memlûkesi olmak üzere Kırım akçesi hesâbıyla bin üç yüz guruşa ki İstanbul hesâbıyla üç yüz yirmi beş guruş semen-i medfû‘a iştirâ ve kabz edip ba‘de vefâtihî bi’l-irsi’ş-şer‘î benimle sulbî kebîr oğlu Mustafa Ağa’ya müntakil mülk-i mevrûslarımızdır deyü vaz‘-ı yedini ikrâr lâkin ber-vech-i muharrer hürriyetini inkâr edicek müdde‘iye-i mevsûfe-i mezkûre müdde‘âsını ahrâr-ı ricâl-i Müslimînden ve kazâ-i mezkûr kasabası ahâlîsinden İstanbul’da Odunkapısı hamallık ticâreti üzere sâkin Veliyüddin b. Telci İbrahim ve el-Kesrî mahallesinde sâkin es-Seyyid Mehmed b. es-Seyyid Ali nâm kimesneler şehâdetleriyle mezbûre Havva Hatun muvâcehesinde vech-i şer‘î üzere ba‘de’l-isbât ve’t-ta‘dîl ve’l-kabûl mûcebiyle hükmolunup müdde‘iye-i mevsûfe-i mezkûre Yeter nâm-ı diğer Tûtî Hatun’dan kasr-ı yed ve sebîli tahliyesiyle mezbûre Havva Hatun’a tenbîh olunduğu Mahkeme-i Bâb’dan huzûr-ı âlîlerine i‘lâm olundu. Fî 21 Cumâdelûlâ sene 1162