Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 188 Hüküm no: 152 Orijinal metin no: [22a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstefan v. Kanalo’nun, vefat eden Apostol v. Aleksi’de olan alacağının terekeden ödenmesi Ma‘rûz Mahmiye-i İstanbul’da Yedikuleler hâricinde vâki‘ Mumhâneler mumcularından İstefan v. Kanalo zimmî meclis-i şer‘-i enverde yine mumhâne-i mezkûre mumcularından olup bundan akdem katîlen hâlik olan Apostol v. Aleksi zimmînin sulbî kebîr oğlu Kostantin zimmî muvâcehesinde hâlik-i mesfûr Apostol zimmîye hayatında târih-i kitâbdan iki sene mukaddem zikrolunan mumhânede malımdan altmış bin akçe ikrâz ve teslîm ol dahi iktirâz ve yedimden ahz u kabz ve istihlâk edip kable’l-edâ ve’l-îfâ hâlik olup meblağ-ı mezkûr zimmetinde kalmağın hâlâ oğlu mesfûr Kostantin zimmîden suâl olunup meblağ-ı mezkûru hâlik-i mesfûrun tereke-i vâfiyesinden bana edâsına tenbîh taleb ederim deyü ba‘de’d-da‘vâ ve’l-inkâr müdde‘î-i merkūm İstefan zimmî müdde‘âsını ahrâr-ı ricâl-i Müslimînden mumcular yiğitbaşısı olan Uzun Mehmed Beşe b. Hasan nâm kimesne ile ahrâr-ı ricâl-i ehl-i zimmetden ve mumhâne-i mezkûre mumcularından Aleksi v. Panayot ve Yorgo v. Tano nâm zimmîler şehâdetleriyle mesfûr Kostantin muvâcehesinde vech-i şer‘î üzere ba‘de’l-isbât ve’t-ta‘dîl ve’l-kabûl müdde‘î-i merkūm meblağ-ı mezbûru hayatında hâlik-i mesfûrdan ahz ve istifâ etmediğine tahlîf-i şer‘î olunmağla mûcebiyle hükmolunup meblağ-ı mezbûr altmış bin akçeyi tereke-i vâfiye-i hâlik-i mesfûrdan müdde‘î-i merkūma edâ ve teslîmle mesfûr Kostantin zimmîye tenbîh olunduğu Mahkeme-i Bâb’dan huzûr-ı âlîlerine i‘lâm olundu fermân men-lehu’l-emrindir. Fî 21 min-Cumâdelûlâ sene 1162