Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 189 Hüküm no: 154 Orijinal metin no: [22b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi b. Hasan’ın, aldığı borcunu ödediğinden rehin bıraktığı mücevherlerini geri vermesi talebiyle İmam Mehmed Efendi’ye açtığı davada haksız bulunduğu Bâ-mühr-i hazret-i efendi Ma‘rûz Sahib-i arzuhâl es-Seyyid Mehmed Çelebi b. Hasan dîvân-ı âlîlerinde ma‘kūd meclis-i şer‘de İmâm es-Seyyid Mehmed Efendi b. Ahmed ile terâfu‘larında bin yüz elli beş senesinde işbu mezbûr İmâm es-Seyyid Mehmed Efendi’nin malından ve yedinden istikrâz ve kabz ve istihlâk eylediğim beş yüz guruş mukābelesinde mecmû‘u bin guruş kıymetli bir sîm pendül sâ‘at ve bir çift altın bilezik ve iki çift sagīr altın bilezik ve bir altın kuşak ve iki elmaslı zehgîr ve iki elmas yüzük ve bir zümrüd yüzük ve bir gök yâkut yüzük ve üç başlı bir mücevher kuşak ve altın pullu bir çift sagīr gerdanlık mezbûra irhân ve teslîm etmişidim el-hâletü hâzihî zimmetimde deynim olan meblağ-ı mezkûr beş yüz guruşu edâ ve eşyâ-i mezkûreyi istirdâd murâd eylediğimde merkūm İmâm es-Seyyid Mehmed Efendi ta‘allül eder suâl olunup deyn-i mezkûrumun edâsıyla eşyâ-i mezbûrenin bana red ve teslîmine tenbîh-i şer‘î olunmak matlûbumdur deyü ba‘de’d-da‘vâ ve’s-suâl mezbûr İmâm es-Seyyid Mehmed Efendi târih-i mezkûrda meblağ-ı mezkûr beş yüz guruşu müdde‘î-i merkūma ikrâzını ve eşyâ-i mezkûreyi yedinden mukābelesinde alâ-tarîkı’r-rehn kabzını ikrâr lâkin târih-i i‘lâmdan üç buçuk sene mukaddem meblağ-ı mezbûr beş yüz guruşu mezbûr Mehmed Çelebi yedinden tamamen ahz ve istifâ ile mukābele-i rehn olan eşyâ-i mezkûreyi bi-a‘yânihâ huzûr-ı Müslimînde red ve teslîm eyledim deyü ba‘de’d-def‘ ve’l-inkâr mezbûr İmâm es-Seyyid Mehmed Efendi def‘-i meşrûhunu lede’t-tezkiye adâletleri zâhir olan Hilâlî Hüseyin Çelebi b. Ali ve Mehmed Çelebi b. Hüseyin şehâdetleriyle mezbûr es-Seyyid Mehmed Çelebi muvâcehesinde vech-i şer‘î üzere isbât etmeğin mûcebince ba‘de’l-hükm mezbûr es-Seyyid Mehmed Çelebi merkūm İmâm es-Seyyid Mehmed Efendi’ye bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 20 Cumâdelûlâ sene 1162