Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 190 Hüküm no: 155 Orijinal metin no: [22b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Latif Çelebi mahallesinden Kurd b. Şaban’ın vakfettiği menzili zapt eden Emin Sinan mahallesi avarız vakfı mütevellisi Hüseyin Efendi b. Halil ile kiracı Mustafa Beşe b. Mansur’un evi Hanife bt. Mehmed’e teslim etmeleri Bâ-mühr-i hazret-i efendi, Yenibahçe kurbünde Latîf Çelebi mahallesinde vâki‘ Kurd b. Şa‘bân nâm sahibü’l-hayrın vakıf menzil isbât-ı vakfiyetidir Ma‘rûz Da‘vâ-yı âti’l-beyânda kıbel-i şer‘den husûmete me’zûne sahibe-i arzuhâl Hanife bt. Mehmed nâm hatun zâtı ba‘de’t-ta‘rîf meclis-i şer‘de zikri âtî menzile Emin Sinan mahallesi avârızı vakfı müstagallâtından olmak üzere vaz‘-ı yedi mütehakkık olan vakf-ı mezkûr mütevellîsi Hüseyin Efendi b. Halil ile menzil-i mezkûrun nısfına bi’l-icâreteyn mutasarrıf olan Mustafa Beşe b. Mansur hazır olduğu hâlde terâfu‘larında Yenibahçe kurbünde Latîf Çelebi mahallesinde vâki‘ ma‘lûmü’l-hudûd ve’l-müştemilât menzilin süknâsı ashâb-ı hayrâtdan merhûm Kurd b. Şa‘bân’ın evlâdına ve evlâd-ı evlâd-ı evlâdına meşrûta vakfı olup hatta menzil-i mezkûrun evlâdiyet ve meşrûtiyyet üzere mutasarrıfı işbu hazır bi’l-meclis Osman Çelebi’nin babası olup bundan akdem fevt olan Abdullah Çelebi hayatında târih-i i‘lâmdan beş sene mukaddem menzil-i mezkûrun ber-minvâl-i muharrer vakfiyetini ve kendinin evlâdiyet ve meşrûtiyet üzere tasarrufunu ve benim evlâd-ı vâkıf-ı mezkûrdan olup süknâ-yı menzil-i mezkûrun kendiden sonra bana intikāl edeceğini huzûr-ı Müslimînde bi’d-defa‘ât ikrâr ve işhâd dahi etmekle süknâ-yı menzil-i mezkûr ber-mûceb-i şart-ı vâkıf benim hakkım iken mütevellî-i merkūm ve müste’cir-i mezbûr bi-gayr-ı hakkın zabtederler suâl olunup kasr-ı yedlerine ve bana teslîme tenbîh olunmak matlûbumdur deyü ba‘de’d-da‘vâ ve’s-suâl mütevellî-i mezbûr cevâbında menzil-i mezkûr müteveffâ-yı mezbûr Abdullah Çelebi’nin hayatında yedinde mülk ve hakkı olup ba‘de vefâtihî sulbî oğlu işbu merkūm Osman Çelebi’ye bi’l-irsi’ş-şer‘î intikāl edip ol dahi işbu Mustafa Beşe’ye semen-i ma‘lûm-ı makbûza bey‘ edip ol dahi ba‘de’l-iştirâ ve’t-tesellüm mütevellîsi olduğum Emin Sinan mahallesi avârızına olmak üzere mal-ı vakfdan yedimden makbûz semen-i ma‘lûma bana bey‘ edip ben dahi bi’t-tevliye ba‘de’l-iştirâ ve’t-tesellüm ve’l-kabz menzil-i mezkûru bi’t-tevliye cânib-i vakfdan icâreteyn-i ma‘lûmeteyn ile ale’l-iştirâki’s-seviy mezbûr Mustafa Beşe ile zevcesi gāibe ani’l-meclis Zeyneb bt. Abdullah nâm hatuna îcâr etmişidim binâenaleyh müstagallât-ı vakf-ı mezkûrdan olmağla bi’t-tevliye ve bi’l-istîcâr vaz‘-ı yed ederiz deyü mütevellî-i merkūm ve mezbûr Mustafa Beşe ve mersûm Osman Çelebi müdde‘iye-i merkūmenin müdde‘âsını bi’l-külliye inkâr eylediklerinde müdde‘iye-i merkūme müdde‘âsını lede’t-tezkiye adâletleri zâhir olan mahalle-i mezbûre ahâlîsinden ve Rumeli kuzâtı eşrâfından Abdi Efendi b. Mehmed Sâdık ve Alemdâr el-Hâc Ali b. el-Hâc İbrahim ve Mehmed Efendi b. Ahmed ve Süleyman Çelebi b. Derviş ve Mehmed Çelebi b. Ali ve İbrahim Odabaşı b. Mehmed şehâdetleriyle mezbûrûn muvâcehelerinde vech-i şer‘î üzere isbât etmeğin mûcebince ba‘de’l-hükmi’ş-şer‘î mütevellî-i mezbûr ile müste’cir-i merkūmun kasr-ı yedlerine tenbîh olunduğu huzûr-ı âlîlerine i‘lâm olundu bâkī fermân hazret-i veliyyü’l-emrindir. Fî 14 Cumâdelûlâ sene 1162