Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 191 Hüküm no: 157 Orijinal metin no: [23a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muhsinehatun mahallesi ahalisinin şikayeti üzerine Kigor v. Gabril’in dükkânını yıkıp duvar inşasına karar verildiği Ma‘rûz İstanbul’da Kumkapı dâhilinde Muhsinehatun mahallesi imâmı es-Seyyid Mehmed Emin Efendi b. Mehmed ve müezzini el-Hâc Hasan b. el-Hâc İbrahim ve Kayyûm Molla Mehmed b. el-Hâc Mustafa ve ahâlîlerinden es-Seyyid Ahmed b. es-Seyyid Mehmed ve Mustafa b. el-Hâc Abdullah ve el-Hâc Ali b. el-Hâc Mehmed ve Molla Ahmed b. Osman ve Mehmed b. Abdullah ve İbrahim b. Ahmed ile keferelerden Mardiros v. Karabet ve Yuvan v. Parsun meclis-i şer‘de Kigor v. Gabril zimmî muvâcehesinde mesfûr Kigor zimmînin zikri âtî dükkânda müste’ciri Zarok v. Mardiros zimmî hazır olduğu hâlde işbu merkūm Kigor zimmînin mahalle-i mezkûrede vâki‘ ma‘lûmü’l-hudû[d] menzili tahtında olup hâzır-ı mesfûr Zarok zimmîye îcâr eylediği turşucu dükkânının mahallemiz ahâlîsine zararı vardır deyü teşekkî ve dükkân-ı mezkûr tahliye ve hedm ve duvar binâsına tenbîh taleb ederiz deyü olan da‘vâlarında merkūm Kigor zimmî dahi dükkân-ı mezkûru hedm ve duvar binâsına ta‘ahhüd edip ol vechile kat‘-ı nizâ‘ ettikleri Mahkeme-i Bâb’dan huzûr-ı âlîlerine i‘lâm olundu. Fî 22 min-Cumâdelûlâ sene 1162