Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 192 Hüküm no: 158 Orijinal metin no: [23a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa’nın bakır eşya bedelinden olan borcunu İbrahim’e ödemesi Ma‘rûz Muhzır Ahmed mübâşeretiyle Bâb Mahkemesi’ne ihzâr olunan Mustafa’nın hasmı İbrahim meclis-i şer‘-i hatîrde mezbûr Mustafa mahzarında târih-i i‘lâmdan üç sene mukaddem yedimden iştirâ ve kabz eylediği ma‘lûmü’l-ecnâs evân-ı nühâsiye semeninden otuz dört guruş hakkım olmağla taleb ederim deyü ba‘de’d-da‘vâ ve’s-suâl mezbûr Mustafa cevâbında fi’l-vâki‘ zikrolunan evân-ı nühâsiyeyi iştirâ eylediğini ikrâr lâkin ben sâbıkā Kavala Vâlîsi Ali Paşa’nın pazara gideni olmamla müdde‘î-i mezbûr zikrolunan evânı paşa-yı mezkûra ver deyü bana vermişidi deyü ba‘de’d-def‘ ve’l-inkâr mezbûr Mustafa ber-vech-i muharrer def‘ini beyâna kādir olmayıp talebiyle müdde‘î-i mezbûr İbrahim’e vech-i şer‘î üzere yemîn verilmeğin alâ-mûceb-i ikrârihî meblağ-ı mezkûrun otuz dört guruşu müdde‘î-i mezbûr İbrahim’e edâ ve teslîme mezbûr Mustafa’ya tenbîh olunduğu huzûr-ı âlîlerine i‘lâm olundu. Fî 24 min-Cumâdelûlâ sene 1162