Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 76 Hüküm no: 72 Orijinal metin no: [14b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kaybolan menzil hüccetinin yenilenmesi Medîne-i Üsküdar’a muzâfe Adalar nâhiyesine tâbi‘ Burgaz Adası karyesinde mütemekkin Aleksandri ve Kostandi ve Tanaş veledey Moskona? zimmîler ve vâlideleri Toyiçe bt. Dimitri Tatanya? ve merkūm Aleksandri kendü nefsinden asıl merkūmûn Kostandi ve Tanaş ve Toyiçe taraflarından ber-vech-i âti’l-beyanda vekîlleri olduğu Tahari v. Hermes ve Hıristodoli v. Todori zimmîler şehâdetleriyle sâbitü’l-vekâlesi olup vekâleten meclis-i şer‘-i hatîr-i lâzimü’t-tevkīrde işbu râfi‘ü’r-rakīm Kiritoz v. Aleksandri zimmî muvâcehesinde ikrâr ve takrîr-i kelâm edüp karye-i mezbûrede vâki‘ bir tarafı Uskoli zimmî şerbethânesi ve bir tarafı leb-i deryâ ve iki tarafı tarîk-i âm ile mahdûd fevkānî iki bâb oda ve tahtında iki sofa ve iki kepenek bakkāl dükkânı ve sokak kapısını müştemil mülk menzili târîh-i vesîkadan sekiz sene mukaddem bâ-hüccet merkūm Moskuna zimmî tarafeynden bi’l-îcâb ve’l-kabûl merkūm Kiritoz zimmîye altı yüz guruş semen-i makbûza bâtten-bey‘ ve teslîm ve temlîk edüp ol dahi târîh-i mezbûrda ber-vech-i muharrer iştirâ ve tesellüm ve temellük ve kabz u kabûl edüp târîh-i mezkûrdan beri merkūm Kiritoz zimmî mülkiyet üzere menzil-i mezkûra mutasarrıf idi lâkin babamız merkūm Moskuna ba‘dehû hâlik olup merkūm Kiritoz zimmî yedine hüccetini vermiş idi benim asâleten ve vekâleten takrîrim tescîl ve hüccet olunup ba‘de’t-tescîl merkūm Kiritoz zimmî yedine i‘tâ olunması matlûbumuzdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Tahrîren fi’l-yevmi’l-hâdi aşer min-Zilka‘deti’ş-şerîfe li-sene tis‘a ve seb‘în ve mi’ete ve elf. Şuhûdü’l-hâl: Es-Seyyid Ahmed Ağa, Kayıkçı Hüseyin Beşe, Ebubekir Efendi, Mehmed Usta, Ahmed Efendi. Kayaoğlu Kostandi, Çiftçioğlu Kostandi, Komi v. Dimitraki, Apostol v. Dimitri, Kordota, Dimitri, Yanaki v. Panayot.