Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 41 Hüküm no: 3 Orijinal metin no: [2a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çarşamba kasabasındaki Rahtvan Ağası Mehmed Bey Camii hitabeti vazifesinin yarısının Seyyid Hafız Mehmed Salih Halîfe’ye tevcihi Ma‘rûz, Arım kazâsı derûnunda Çarşamba kasabasında vâki‘ Rahtvan Ağası Mehmed Bey Câmi‘-i şerîfinde galle-i vakfından almak üzere yevmî yedi akçe ile hitâbeti es-Seyyid Mehmed Halîfe b. Feyzullah’ın üzerinde olduğu askerî rûznâmçesinden derkenâr olunmağla iktizâsı i‘lâm olunmak bâbında sâdır olan fermân-ı âlîşâna imtisâlen hitâbet-i mezkûre mutasarrıfı Mehmed Halîfe idiği kazâ-i mezbûr ahâlîsinden Der-aliyye’de bulunan Mehmed b. Hasan ve İbrahim b. Mehmed ve İbrahim b. Mustafa ihbârlarıyla zâhir olan sahib-i arzuhâl es-Seyyid Mehmed Halîfe meclis-i şer‘-i enverde derûn-ı arzuhâlde mezkûrü’l-ism kazâ-i mezkûr ahâlîsinden es-Seyyid Hâfız Mehmed Salih Halîfe b. İsmail mahzarında takrîr-i kelâm edip ben bir müddet tahsîl-i ulûm-ı nâfi‘a niyet-i hayriyesiyle Der-aliyye’de ikāmet murâd eylediğime binâen hizmet-i lâzımesi mu‘attal kalmamak için hitâbet-i mezkûrenin nısfını üzerinde ibkā ve nısf-ı âharını hüsn-i rızâ ve ihtiyârımla merkūm es-Seyyid Hâfız Mehmed Salih Halîfe’ye kasr-ı yed etmemle nısf hisse-i mezkûre kasr-ı yedimden merkūma tevcîh buyurulmak niyâzımdır dedikde mezbûr es-Seyyid Hâfız Mehmed Salih Halîfe’nin muhtâr-ı cemâ‘at ve mültemes-i ahâlî olduğu muhbirûn-ı merkūmûn ihbârlarıyla zâhir ve ehliyet ve istihkākı dahi lede’l-imtihân ma‘lûm ve bâhir olmağın bu sûretde tekessür-i huddâm maddesinde edâ-yı hizmet kā‘idesi derkâr olduğuna nazaran nısf hitâbet-i mezkûreyi merkūm es-Seyyid Mehmed Halîfe’nin kasr-ı yedinden varıp bi’n-nefs edâ-yı hizmet etmek şartıyla merkūm es-Seyyid Hâfız Mehmed Salih Halîfe’ye tevcîh ve atîk beratı kaleminde battalda hıfz olunarak herbirinin yedlerine müceddeden başka başka beratları i‘tâ olunmak bâbında emr [ü] fermân hazret-i men-lehu’l-emrindir. Fi’l-yevmi’s-sâmin ve’l-işrîn min-Zilhicceti’ş-şerîfe li-sene seb‘a ve erba‘în ve mieteyn ve elf.