Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 41 Hüküm no: 4 Orijinal metin no: [2a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Devrekâni kazasında bulunan Şeyh Bali zâviyedarlığına babası Seyyid Ebûbekir’in vefatı üzerine oğlu Seyyid Ahmed’in tevcihi Ma‘rûz, Devrekâni kazâsında vâki‘ Şeyh Bali Zâviyesi’nin evlâdiyet ve meşrûtiyet üzere zâviyedârlık hissesi es-Seyyid Ebûbekir b. es-Seyyid Mustafa’nın üzerinde olduğu askerî rûznâmçesinden derkenâr olunmağla meâl-i arz ve derkenâra nazar ve bi’t-tahkīk iktizâsı i‘lâm olunmak bâbında sâdır olan fermân-ı âlîşâna imtisâlen kazâ-i mezbûr ahâlîsinden Der-aliyye’de bulunan bî-garaz erbâb-ı vukūfdan Suhteoğlu İbrahim b. Mustafa ve Dalfesoğlu es-Seyyid Mehmed b. Memiş ve Yolasığmazoğlu Hüseyin b. Memiş nâm kimesneler meclis-i şer‘a celble keyfiyeti gereği gibi etrâfıyla suâl olundukda derûn-ı arzda tahrîr ve inhâ kılındığı üzere merkūm es-Seyyid Ebûbekir’in fevti ve dârende-i arz merkūm es-Seyyid Ahmed sulbî sahîh oğlu olduğunu ve zâviye-i mezkûre mutlaka evlâd-ı evlâda meşrûta vakıf olmak üzere te‘âmül-i kadîm cârî olageldiğine nazaran mezbûr es-Seyyid Ahmed meşrûtun-lehi olup bundan gayri müstahıkk-ı âharı olduğu ma‘lûmumuz değildir deyü herbiri alâ-tarîkı’ş-şehâde ihbâr etmeleriyle bu sûretde ber-mûceb-i ihbâr hissedârlık-ı mezkûr müteveffâ-yı mezbûrun mahlûlünden oğlu merkūm es-Seyyid Ahmed’e tevcîh olunmak bâbında emr ü fermân hazret-i [men-lehu’l-emrindir]. Fî 17 Z sene [12]47