Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 196 Hüküm no: 165 Orijinal metin no: [23b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kirişçi esnafının kethudası, yiğitbaşıları ve bazı ustalarının, esnafın imal ettikleri kirişleri eksik fiyatla satın alıp başkalarına satmalarına mani oldukları ve hisselerini eksik dağıtmak suretiyle yaptıkları müdahaleden menedildikleri Ma‘rûz Kirişçi esnâfından ashâb-ı arzuhâl ahu [ahi] babaları Mehmed Çelebi b. Hacı İbrahim ve ustaları Ali Çelebi b. Mustafa ve Hüseyin Çelebi b. Abdullah ve Mehmed b. Mustafa ve Yakub b. Mustafa ve Yusuf b. Abdullah ve Feyzullah b. Ali ve Mustafa b. Yusuf ve es-Seyyid Mehmed Çelebi b. İbrahim ve Mustafa Çelebi b. Mehmed ve Mustafa b. Osman nâm kimesneler meclis-i şer‘-i enverde esnâf-ı mezkûrenin kethudâsı Ahmed Odabaşı b. Mahmud ve yiğitbaşıları Mehmed b. Abdullah ve Altıncıoğlu Ahmed Çelebi b. Ali ve İmâm oğulları Ali Çelebi ve Ahmed Çelebi ibney Mehmed ve el-Hâc Mahmud ve Mehmed b. Mustafa ve Mehmed Çelebi b. Ömer ve el-Hâc Hamza b. Mustafa ve el-Hâc Ahmed muvâcehelerinde mezbûrûn kethudâ ve yiğitbaşı ve Altıncıoğlu ve İmâm oğulları ve Hacı Hasan ve Mehmed ve diğer Mehmed Çelebi ve Hacı Hamza ve Hacı Mustafa birbirleriyle yek-dil olup bizim kârhânelerimizde işlediklerimiz kirişlerimizi bizler semen-i misliyle âhara sattırmayıp ve kendileri noksan bahâ ile ve nes’eten yedlerimizden alıp ve ba‘de’l-ahz dahi satılmadı deyü metâ‘ımızı çürüdüp yine bizlere red ile gadr ederler ve bizim esnâfımız ustaları beynlerinde kadîmden beri vaz‘ olunan yüz yedi hisselerimizi [24a] tevzî‘de tamam vermezler deyü teşekkî ve men‘lerine tenbîh taleb ederiz deyü olan da‘vâlarında mezbûrûn kethudâ ve yiğitbaşı ve ustalar cevâblarında müdde‘ûn-ı mezkûrûnun işledikleri metâ‘larını yedlerinden ber-vech-i muharrer alıp âhara bey‘lerinden men‘ ettiklerini inkârlarından mâ‘adâ fîmâ-ba‘d dahi müdde‘ûn-ı mezkûrûn ustalar ve sâirler kerhânelerinde [kârhânelerinde] işledikleri metâ‘larını diledikleri müşterilerine bey‘ edip âhar usta ve kethudâ ve yiğitbaşıdan bir ferd karışmayıp ve kadîmî üzere olan yüz yedi hisseden herbirimize hisselerini kadîmî üzere verip ve aldığımız hisselerimizi kendimiz ve dilediğimiz ustalara işledip âhardan birimiz[e] mümâna‘at etmemek üzere tarafeynin herbiri ta‘ahhüd edip ol vechile kat‘-ı nizâ‘ ettikleri Mahkeme-i Bâb’dan huzûr-ı âlîlerine i‘lâm olundu. Fî 28 Cumâdelûlâ sene 1162