Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 200 Hüküm no: 172 Orijinal metin no: [24b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manisalı Çelebi mahallesi ahalisinin, uygunsuz tavır ve hareketleri olan Acem Emine’nin mahalleden çıkartılması talepleri Ma‘rûz Ashâb-ı arzuhâl Manisalı Çelebi mahallesi imâmı es-Seyyid Hasan Efendi ve Müezzin Mehmed Halîfe ve ahâlîsinden Molla Mehmed b. Hasan ve Molla Hüseyin b. Mehmed ve el-Hâc Ebûbekir Çelebi b. Mehmed ve es-Seyyid Mehmed b. Hüseyin ve Abdullah Beşe b. Mehmed ve es-Seyyid Mehmed b. Kasım ve Salih Beşe b. Ebûbekir ve Mustafa b. İbrahim ve Ömer b. Mustafa nâm kimesneler meclis-i şer‘-i hatîrde derûn-ı arzuhâlde mezkûreti’l-ism Acem Emine nâm hatun muvâcehesinde mezbûre Emine mahallemiz ahâlîsinden olup lâkin kendi hâlinde olmayıp öteden beri dil-âzâr olduğundan mâ‘adâ nâ-mahrem kimesneler menziline gelip ve mezbûrenin dahi nâ-mahremden ictinâbı olmamağla iki def‘a mahalleden ihrâci’çün i‘lâm-ı şer‘î olunmuşiken fîmâ-ba‘d kendi hâlinde olmağa ta‘ahhüd ile cemâ‘ati iğfâl ile mahallemizde sâkine olup hâlâ dahi nâ-mahrem âdemleri yine evine getirip evvelkiden ziyâde fesâda ictirâ eder olmağla mezbûre Emine’den bir vechile emn ü râhatımız yokdur deyü mazmûnu takrîrlerine mutâbık iki kıt‘a i‘lâm-ı şer‘î ibrâz ile teşekkî ve mezbûre Emine’nin mahalle-i mezbûreden ihrâc olunmasını iltimâs eyledikleri Mahkeme-i Bâb’dan huzûr-ı âlîlerine i‘lâm olundu. Fî-selhi Cumâdelûlâ sene 1162