Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 200 Hüküm no: 173 Orijinal metin no: [24b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Melkon v. İstefan’ın Hüseyin b. Osman’a olan borcunu ödemesine yapılan tenbih Ma‘rûz Hasköy sakaları kethudâsı sahib-i arzuhâl Hüseyin b. Osman meclis-i şer‘-i enverde derûn-ı arzuhâlde mezkûrü’l-ism Melkon v. İstefan zimmî muvâcehesinde târih-i i‘lâmdan üç sene mukaddem merkūm Melkon zimmî malımdan ve yedimden yüz elli üç guruş istikrâz ve ahz u kabz ve istihlâk etmişidi hâlâ taleb ederim deyü da‘vâ ve merkūm Melkon zimmî dahi cevâbında fi’l-vâki‘ kazıyye minvâl-i muharrer [üzere] olduğunu ba‘de’l-ikrâr deyn-i mezkûrumu târih-i i‘lâmdan bir buçuk sene mukaddem Hasköy’de Pîrîkapısı başında tamamen edâ eyledim deyü olan def‘ini dahi müdde‘î-i mezbûr Hüseyin merkūm Melkon zimmînin işbu târih-i mürâfa‘adan bir gün mukaddem hâlâ meblağ-ı mezkûr yüz elli üç guruş zimmetinde bana deyni olduğunu alâ-re’si’l-işhâd ikrâr ve işhâd ve edâsında benden istimhâl eyledi deyü ba‘de’d-def‘ ve’l-inkâr müdde‘î-i mezbûr Hüseyin def‘i’d-def‘-i mezkûrunu ahrâr-ı ricâl-i Müslimînden ve saka tâifesinden Bekir Beşe b. Mustafa ve ehl-i zimmetden ve tâife-i mezkûreden Çaçuk v. Menkar şehâdetleriyle merkūm Melkon zimmî muvâcehesinde vech-i şer‘î üzere ba‘de’l-isbât ve’t-ta‘dîl ve’l-kabûl mûcebiyle hükmolunup meblağ-ı mezbûr yüz elli üç guruşu müdde‘î-i mezbûr Hüseyin’e edâ ile merkūm Melkon zimmîye tenbîh olunduğu Bâb’dan huzûr-ı âlîlerine i‘lâm olundu. Fî-gurreti C sene 1162