Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 209 Hüküm no: 190 Orijinal metin no: [26a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi v. Bako, Yorgi v. Nikola ve bazı mellahların, Kasımzâde Abdurrahman’ın sefinesinde gördükleri hizmetlerinin karşılığının eksik verildiği iddiasıyla sefine sahibi ile Mustafa Reis b. Ahmed’e açtıkları davada haksız bulundukları Ma‘rûz Mellâhîn tâifesinden ashâb-ı arzuhâl Yorgi v. Yako ve diğer Yorgi v. Nikola ve Nikola v. Kiryako ve İlya v. Panayot ve Andreya v. Aleksandıra ve Sulkar v. Apostol ve Todori v. İlya ve Yani v. Dimitri ve İlya v. Kostantin ve Tanaş v. Yorgi ve Siro v. Lefter ve Yani v. Nikola nâm zimmîler Mahkeme-i Bâb’da meclis-i şer‘-i enverde ashâb-ı sefâinden arzuhâlde mezkûrü’l-ism el-Hâc Kasımzâde es-Seyyid el-Hâc Abdurrahman muvâcehesinde mezbûr es-Seyyid el-Hâc Abdurrahman’ın şayka ta‘bîr olunur sefînesinde reis ve vekîli olan Mustafa Reis b. Ahmed dahi hazır olduğu hâlde hâzır-ı mezbûr Mustafa Reis bizim [26b] herbirimizi ber-âdet-i mellâhîn doksanar keyl hınta-i leşid kavliyle sefîne-i mezkûre mellâhlığında ba‘de’l-istîcâr ve’l-îcâr sefîne-i mezkûreye otuz iki gün hizmetle varıp İbrail İskelesi’nden ba‘de’t-tahmîl Âsitâne-i sa‘âdet’e getirip itmâm-ı hizmet etmiş iken zikrolunan doksan keyl leşidin nemâsından hâsıl olan yirmi ikişer guruş ücretimizin on birer guruşunu bizlere edâ ve teslîm ve bâkīsi zimmetlerinde kalmağla taleb ederiz deyü da‘vâ ve mezbûrân Reis Mustafa ve es-Seyyid el-Hâc Abdurrahman dahi cevâblarında fi’l-vâki‘ müdde‘ûn-ı mezkûrûnu zikrolunan leşid kavliyle istîcarlarını ikrâr lâkin leşid-i mezkûrun nemâsından ancak makbûz-ı mezkûrları hâsıldır deyü iddi‘â edip ve müdde‘ûn-ı mezkûrûn ziyâde olduğunu beyâna kādirler olmamağla mezbûrân Reis Mustafa ve es-Seyyid el-Hâc Abdurrahman zikrolunan doksan keyl hıntanın nemâsı ancak on bir guruş olup ve meblağ-ı mezkûr on bir guruş dahi müdde‘ûn-ı mezkûrûnun müddet-i mezkûrede olan hizmetlerinin ecr-i mislinden dahi ziyâde olduğunu bâ-fermân-ı âlî ehl-i hibre olan Abdullah Çelebi b. Mehmed ve Molla Hüseyin ve yiğitbaşı İbr[ahim] Çelebi b. Abdullah ve es-Seyyid Ali b. Ahmed nâm kimesnelerin alâ-tarîkı’ş-şehâde ihbârlarıyla zâhir olmağın müdde‘ûn-ı mezkûrûn da‘vâ-yı mezkûreleriyle mezbûrân Reis Mustafa ve es-Seyyid el-Hâc Abdurrahman’a mu‘ârazadan men‘ olunmuşdur. Fî 28 Ca sene 1162