Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 210 Hüküm no: 192 Orijinal metin no: [26b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mirahur mahallesi ahalisinin, uygunsuz hal ve hareketleri olan Kürkçü Bali v. Gabril ile hanımı Kugabu’nun mahallelerinden uzaklaştırılmaları talepleri Mahalleden ihrâc Ma‘rûz Mahmiye-i İstanbul’da Mirâhur mahallesi sâkinelerinden sahibe-i arzuhâl Kugabu zimmiyenin zevci Kürkçü Bali v. Gabril zimmî meclis-i şer‘-i hatîrde arzuhâlde mezkûr Kuyumcu Anaştat [Anaştaş] v. Velvet ve kebîr oğlu Panayot zimmîler muvâcehelerinde mahalle-i mezbûre imâmı Ali Efendi b. İbrahim ve müezzini es-Seyyid Molla Hasan b. es-Seyyid Mustafa ve ahâlîsinden İsmail Çelebi b. Hüseyin ve es-Seyyid Salih b. Mehmed ve el-Hâc Mustafa b. Mehmed ve Molla Süleyman b. Mehmed ve Molla Osman b. Ahmed ve mescid imâmı Molla Ahmed b. Mustafa ve civârındaki el-Hâc Hüseyin mahallesi imâmı Mehmed Efendi b. Veliyüddin [nâm] kimesneler ile civârında mütemekkin re‘âyâdan Papa Dimitri v. Kostantin ve Yorgaki v. Simyon ve Manol v. Kostantin ve Yanaki v. Kiryako ve Yorgaki v. Hanoz zimmîler hazırlar olduğu hâlde târih-i i‘lâmdan dokuz gün mukaddem mesfûrân Kuyumcu Anaştaş ve oğlu Panayot zimmîler bana bi-gayr-ı hakkın pezevenk lafzıyla şetm eylediler deyü da‘vâ ve mûceb-i şer‘îsini taleb eyledikde mesfûrân Kuyumcu Anaştaş ve oğlu Panayot zimmîler dahi şetm-i mezkûru inkârından gayri hâzırûn bi’l-meclis olan Müslimîn-i mezkûrûn ile re‘âyâ-yı mesfûrûndan herbirleri mesfûr Kuyumcu Anaştaş ve oğlu Panayot zimmîler kendi hâllerinde ırz ve kisbleriyle meşgūller olup bir kimesneye zarar ve te‘addîleri kat‘a zuhûr etmeyip ve merkūm Kürkçü Bali zimmî ve zevcesi gāibetü ani’l-meclis Kugabu zimmiye öteden beri kendi hâllerinde olmayıp evlerine nâ-mahrem ve ecnebi ve ahvâlleri ma‘lûm olmayan çoban ve ecnâs-ı muhtelifeyi getirmeleriyle merkūmân Kürkçü Bali ve zevcesi Kugabu zimmîlerden kat‘a emn ü râhatımız yokdur deyü merkūmân Kürkçü Bali ve zevcesi Kugabu zimmîlerin sû’-i hâllerini ihbâr ve mahallelerinden ihrâc ile ta‘zîr olunmaları bâbında fermân-ı âlî ricâsında oldukları Mahkeme-i Bâb’dan huzûr-ı âlîlerine i‘lâm olundu. Fî 6 C sene 1162