Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 211 Hüküm no: 193 Orijinal metin no: [26b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Serkiz v. İstefan’ın, vefat eden annesi Drohi bt. Serkiz’in ölmeden önce aldığı borca karşılık Haim bt. Serkiz’e sattığı evin borcu ödemek suretiyle geri verilmesi talebiyle açtığı davayı ispat edemediği Ma‘rûz Derûn-ı arzuhâlde mezkûre olup mahmiye-i İstanbul’da Çerâğī Hasan mahallesi mütemekkinelerinden iken mukaddemâ hâlike olan Drohi bt. Serkiz’in sadrî sagīr oğlu diğer Serkiz’in babası ve velîsi İstefan v. Serkiz zimmî meclis-i şer‘-i enverde mahalle-i mezkûre mütemekkinelerinden Haim bt. Serkiz nâm zimmiyenin zevci ve tarafından husûs-ı âti’z-zikrde husûmete vekîli olduğu Komidas v. Şahin ve Kaloni v. Pedros zimmîler şehâdetleriyle sâbit Zakar v. Avdik zimmî muvâcehesinde oğlum sagīr-i mesfûrun anası hâlike-i mesfûre hayatında ve helâkinden sekiz sene mukaddem merhûme Canfeda Hatun Vakfı’ndan bi’l-icâreteyn tasarrufunda olan mahalle-i mezkûrede vâki‘ ma‘lûmü’l-hudûd ve’l-müştemilât menzilini müvekkile-i mesfûreye olan yüz elli guruş deyni mukābelesinde ferâğını müsâveme ederken her ne zaman ki deyn-i mezkûrunu edâ eyledikde yine menzil-i mezkûru ma‘rifet-i mütevellî ile geri kendiye ferâgat etmek şartını mukāvele edip ba‘dehû menzil-i mezkûrunu müvekkile-i merkūmeye kat‘iyen fâriğa [27a] olup ancak ferâğ-ı mezkûr şart-ı mezkûra binâen olmağla fâsid olmağın hâlâ deyn-i meblağ-ı mezkûr yüz elli guruşu müvekkile-i merkūme yedinden kabz edip menzil-i mezkûru ma‘rifet-i mütevellî ile sagīr-i mezbûr için bi’l-velâye bana reddile vekîl-i mesfûra tenbîh taleb ederim deyü da‘vâ ve vekîl-i mesfûr Zakar zimmî dahi bi’l-vekâle cevâbında fi’l-vâki‘ müvekkilesi mesfûrenin menzil-i mezkûru hâlike-i mesfûreden kat‘iyen tefevvüzünü ikrâr ancak ferâğ-ı mezkûrda şart-ı mezkûr mukāvelesini inkâr etmeğin eb-i müdde‘î-i mesfûr İstefan zimmî bi’l-velâye müdde‘âsını beyân için ba‘de’l-istimhâl ve’l-imhâli’ş-şer‘î on iki gün mürûr edip müdde‘âsını beyâna kādir olamayıp ve menzil-i mezkûr dahi vakıf olup tasarrufu dahi ancak mütevellî izin ve temessüğüyle olduğundan gayri müddet-i ferâğ-ı mezkûr dahi sekiz sene mürûr etmeğin müdde‘î-i mesfûr İstefan zimmî bilâ-beyyine-i âdile bî-vech mu‘ârazadan men‘ olunduğu Mahkeme-i Bâb’dan huzûr-ı âlîlerine i‘lâm olundu. Fî 6 Cumâdelâhire sene 1162