Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 215 Hüküm no: 200 Orijinal metin no: [27b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah b. Receb ve Hasan Beşe b. Yusuf’un nizama aykırı olarak sokak aralarında ateş yakıp kebab ve yiyecek satmaktan menedildikleri Bâ-mühr-i hazret-i efendi Ma‘rûz İstanbul’da vâki‘ aşçı ve kebabcı esnâfının kethudâları es-Seyyid İbrahim ve yiğitbaşıları Ahmed Usta ve ihtiyâr ustalarından es-Seyyid Süleyman ve Mehmed ve Ali Beşe ve Ebûbekir Çelebi ve sâir Müslim ve zimmî ustalardan mazbûtü’l-esâmî yirmi neferden mütecâviz kimesneler meclis-i şer‘de sahib-i arzuhâl es-Seyyid Abdullah b. Receb ve Hasan Beşe b. Yusuf muvâcehelerinde ez-kadîm nizâmımız hirfetimiz erbâbından olmayıp ecnebi olanlar san‘atımıza karışmayıp ve çarşı yüzünd[e] dükkânlarda ve esvâkda ateş yakıp ta‘âm tabh etmek memnû‘âtdan olup bazı saraylardan bakıye kalan matbûh soğuk ta‘âm bey‘ etmek dahi birkaç mahalle mahsûs ve onlarda dahi soğuk ta‘âmları teshîn için ateş yakmak ve mu‘ayyen olan mahallerden mâ‘adâ dükkânlarda ve köşebaşlarında ve esvâkda bey‘ etmek kezâlik memnû‘ olup nizâm-ı kadîmimiz bu vechile cârî ve hilâfıyla hareket olunduğu yoğiken işbu mezbûrlar Kumkapı hâricinde tarîk-ı âmda bu esnâlarda mekân ittihâz edip hilâf-ı nizâm-ı kadîm ve mugāyir-i senedât-ı mer‘iyye ve emr-i âlî ta‘âm bey‘ ederler ve teshîn için ateş yakarlar deyü takrîrlerine mutâbık senedât-ı mer‘iyye ve emr-i âlî ibrâz ile mezbûrândan ba‘de’t-teşekkî onlar dahi mahâll-i merkūmda ber-minvâl-i muharrer ta‘âm bey‘ eylediklerini mukır ve mu‘terif olmalarıyla hilâf-ı emr-i âlî ve mugāyir-i nizâm-ı kadîm ba‘de’l-yevm hareket etmemek üzere mezbûrâna ba‘de’t-tenbîh nizâm-ı kadîm-i mezkûr fîmâ-ba‘d dahi düstûrü’l-amel olmak üzere esnâf-ı mezkûre emr-i âlî istid‘â ve istirhâm eyledikleri ma‘lûm-ı devletleri buyruldukda emr ü fermân hazret-i veliyyü’l-emrindir. Fî 8 Cumâdelâhire sene 1162