Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 216 Hüküm no: 201 Orijinal metin no: [27b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Afife Hatun’un, Pîrî Çavuş mahallesinde Abdullah Ağa b. Mustafa’dan kendisine intikal eden evi zaptettiği iddiasıyla Emine Hanım’a açtığı davada haksız bulunarak davasının reddedildiği Bâ-mühr-i hazret-i efendi Ma‘rûz Sahibe-i arzuhâl Afife Hatun’un vekîl-i müseccel-i şer‘îsi Ali Çelebi b. Mustafa meclis-i şer‘de <> bundan esbak fevt olan Abdullah Ağa b. Mustafa b. Mehmed li-ebeveyn kız karındaşı ve hasran vârisesi ve zikri âtî menzilin ebniyesinde [ebniyesine] bi’l-verâse vaz‘-ı yedi mütehakkık olan Emine Hanım kezâlik vekîl-i müseccel-i şer‘iyesi el-Hâc Hasan b. Ahmed ile Haydar Hasan Dede Vakfı’nın bi’l-fi‘il mütevellîsi Mahmud Efendi hazır olduğu hâlde taraflarından İstanbul’da Pîrî Çavuş mahallesinde vâki‘ hâlâ müvekkil[e]-i merkūme Emine Hanım vâzı‘atü’l-yed olduğu ma‘lûmü’l-hudûd menzili Haydar Dede Vakfı’ndan müteveffâ-yı mezbûr Abdullah Ağa’nın ile’l-vefât bi’l-icâreteyn tasarrufunda olup müteveffâ-yı mezbûr Abdullah Ağa’nın anası müteveffât Hadîce bt. eş-Şeyh Mehmed hayatında bin yüz yirmi senesi Rebî‘ülâhir’in onuncu günü yedimde memlûke câriyesi olan Gülbûy’u oğlu merkūm Abdullah Ağa’ya hîbe ve teslîm edip ol dahi ba‘de’l-ittihâb ve’t-tesellüm istifrâş etmekle mezbûrun firâşından yirmi bir senesi Şevval’inde müvekkil[e]-i mezbûr[e] Afife mezbûre Gülbûy’dan mütevellide oldukda merkūm Abdullah Ağa da‘vet etmeğin müvekkilim mezbûre müteveffâ-yı merkūmun sulbiye kızı olmağla menzil-i mezkûru babası müteveffâ-yı mezbûrdan müvekkilem mezbûreye intikāl-i [28a] âdî ile intikāl etmiş iken merkūme Emine Hanım bi-gayr-ı hakkın tasarruf eder suâl olunup menzil-i mezkûrdan kasr-ı yedine ve re’y-i mütevellî ile müvekkil-i mezbûre Afife mutasarrıfe olmak üzere tenbîh olunmak <> bi’l-vekâle matlûbumdur deyü ba‘de’d-da‘vâ ve’s-suâl vekîl-i mezbûr cevâbında menzil-i mezkûrun arsası senede üç yüz akçe mukāta‘alı ve binâsı bâ-hüccet-i şer‘iye müteveffâ-yı mezbûr Abdullah Ağa’nın hayatında yedinde mülk-i müşterâsı olup ve müvekkile-i mezbûre Afife bin yüz kırk yedi senesinde Rumeli kazaskeri olan merhûm es-Seyyid Mahmud Efendi huzûrunda mezbûrân Abdullah Ağa ve Gülbûy’un hayatlarında ber-vech-i muharrer nesebini da‘vâ ettikde merkūm Abdullah Ağa nefy-i neseb onlar dahi tasdîk eyledikleri i‘lâm olunmuşiken mezbûr Abdullah Ağa’nın vefâtından sonra bin yüz altmış bir senesi Rebî‘ülevvel’inin dokuzuncu günü kassâm-ı askerî olan müderrisîni’l-kirâmdan Abdullah Efendi huzûrunda müvekkile-i mezbûre Afife ber-minvâl-i muharrer da‘vâ-yı nesebe tesâddî ve ba‘dehû da‘vâ-yı mezkûresinde mubtıle ve kâzibe olduğunu i‘tirâf ve tahrîk ile nizâ‘a tesâddî etmişidim deyü keff-i yed ve müvekkilem merkūme Emine Hanım’ın malından seksen guruş kabz ve müteveffâ-yı mezbûrun akār ve menkūl bi’l-cümle ism-i mâl ıtlâk olunur terekesine ve husûs-ı mirasa ve sâir hukūk-ı ma‘lûme ve mechûleye müte‘allika âmme-i da‘vâdan müvekkilem merkūme Emine Hanım’ın zimmetini ibrâ ve ıskāt edip ba‘dehû bin yüz altmış bir senesi Şa‘bân-ı şerîf’inin on ikinci günü hâlâ revnak-efzâ-yı sadr-ı Rum semâhatlü sa‘âdetlü Mehmed Said Efendi hazretleri huzûrunda tekrar ben müvekkilem mezbûrenin vekîl-i müseccel-i şer‘îsi olmamla benim mahzarımda ber-minvâl-i muharrer da‘vâ-yı nesebe tesâddî eyledikde ben dahi bi’l-vekâle takrîr eylediğim ibrâ-i mezkûr ile def‘ ve def‘-i mezkûrumu şühûd-ı udûl ile müvekkile-i mezbûre Afife muvâcehesinde isbât etmeğin mezbûre Afife bî-vech mu‘ârazadan men‘ olunmuşidi deyü min-külli’l-vücûh takrîr-i meşrûhuna mutâbık mûmâ-ileyh hazretlerinin hâtemini hâvî bir kıt‘a i‘lâm-ı şer‘î ibrâz ile ba‘de’d-def‘ ve’s-suâl vekîl-i mezbûr Ali Çelebi mazmûn-ı i‘lâm-ı mezkûru mukır ve mu‘terif <> olmağın mûcebince müvekkile-i mezbûre Afife mezbûre Emine Hanım’a bî-vech mu‘ârazadan men‘ olunduğu huzûr-ı âlîlerine i‘lâm olundu bâkī fermân hazret-i men-lehu’l-emrindir. Fî 8 Cumâdelâhire sene 1162