Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 219 Hüküm no: 205 Orijinal metin no: [28b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kebabcılar yiğitbaşısı Ahmed Çavuş b. Ahmed’in inşa ettiği evinin pencerelerinin komşularına zararı olduğu Keşf-i havâle bâ-mühr-i hazret-i efendi Ma‘rûz Sâdır olan fermân-ı âlîlerine imtisâlen savb-ı şer‘-i enverden irsâl olunan Feyzullah Efendi dâ‘îleri hâssa mi‘mâr hulefâlarından el-Hâc Süleyman ve es-Seyyid Mehmed halîfeler ile İstanbul’da Hoca Üveys mahallesinde vâki‘ mahâll-i nizâ‘ın üzerine varıp mazbûtü’l-esâmî Müslimîn huzûrlarında ba‘de akdi’l-meclis Dergâh-ı âlî çavuşlarından Ahmed Çavuş b. Ahmed kendi nefsinden asâleten ve zevcesi Zeliha bt. Hasan nâm hatun tarafından vekîl-i sâbitü’l-vekâlesi olmağla vekâleten ve karşısında vâki‘ bir bâb menzile mutasarrıf olan Ali Çelebi b. el-Hâc Mehmed meclis-i ma‘kūd-ı mezkûrda derûn-ı arzuhâlde mezkûrü’l-ism kebabcılar yiğitbaşısı Ahmed Usta muvâcehesinde herbiri mezbûr Ahmed Usta işbu mülk menzilinin müceddeden binâ eylediği fevkānî bir bâb odasının üç aded pencerelerinden bizim ale’l-iştirâk mutasarrıf olduğumuz menzilimizin makarr-ı nisvân olan fevkānî odamızın bir penceresine ve karşısında vâki‘ benim menzilimin dahi makarr-ı nisvân olan odasının iki penceresine kezâlik üç aded âhar pencerelerinden ki cem‘an altı aded pencerelerinin havâlesi olmağın mu‘âyene olunup zarar-ı şer‘îsi men‘ u def‘ olunmak matlûbumuzdur deyü ba‘de’d-da‘vâ ve’n-nazar fi’l-hakīka mezbûr Ahmed Usta’nın binâ eylediği fevkānî odasının Memican Efendi türbesi üstünden üç aded yan pencerelerinden müdde‘î-i mezbûr Ahmed Çavuş’un bir penceresine ve tarîk-ı âmma vaz‘ eylediği kezâlik üç aded âhar pencerelerinden dahi mezbûr Ali Çelebi’nin iki pencerelerine havâlesi olduğunu ve zarar-ı şer‘îsi tahta perde havâle yapılmağla bi’l-külliye mündefi‘ olacağı ba‘de’l-mu‘âyene ve’l-müşâhede zikrolunan altı aded pencerelerinin tahta perde yapmağla havâlesini def‘e mezbûr Ahmed Usta’ya tenbîh eylediğini mezbûr dâ‘îleri mahâllinde ba‘de’t-tahrîr ümenâ-i şer‘le meclis-i şer‘a gelip alâ-vukū‘ihî inhâ ve takrîr eyledikleri huzûr-ı âlîlerine i‘lâm olundu. Fî 8 min-Cumâdelâhire sene 1162