Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 220 Hüküm no: 206 Orijinal metin no: [28b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı İsmail’in yaptıracağı evini komşusu Ayşe bt. Hacı Mehmed’in evine zarar vermeyecek yükseklikte yapması Keşf bâ-mühr-i hazret-i efendi Ma‘rûz Fermân-ı âlîlerine imtisâlen husûs-ı âti’l-beyâna savb-ı şer‘den bi’l-iltimâs ta‘yîn olunan keşif nâibimiz Ruhi Mustafa Efendi dâ‘îleri mi‘mârân-ı hâssadan Üstâd Halil ve Abdullah halîfe ile sahibe-i arzuhâl Âişe nâm sagīrenin babası müteveffâ el-Hâc Mehmed’den irsle kendiye müntakil menzile varıp cerîdede mastûrü’l-esâmî Müslimîn huzûrunda akd eylediği meclis-i şer‘de sagīre-i mezbûrenin vasîyy-i muhtârı Süleyman b. Abdullah câr-ı mülâsıkı ve hasmı derûnda mezkûrü’l-ism el-Hâc İsmail muvâcehesinde hâlâ tasarrufunda ve mahâll-i nizâ‘ olan menzilini tecdîd[e] mübâşeret ve âdeten müsâ‘ade buyurula gelen mikdârdan ziyâde irtifâ‘ ile binâ ve menzil-i mevrûs-ı mezbûrun eşrâf ve havâsını kat‘ ve tekşîf ile sagīre-i mezbûreye gadr murâd eder deyü ba‘de’d-da‘vâ ve’l-inkâr münâza‘un-fîh olan menzil-i mezbûra nazar ve mi‘mârân-ı mezbûrân mesâha ve ihbârları ile el-yevm mevcûd olan binâsı irtifâ‘an on zirâ‘ idiği mu‘âyene olunmağın ber-muktezâ-yı kānûn üzerine ancak iki zirâ‘ dahi zam edip mecmû‘-ı ebniyesi mugāyir-i emr-i âlî on iki zirâ‘ irtifâ‘ından ziyâdeye tecâvüz etmemek için mübâşir ma‘rifeti ile mezbûr el-Hâc İsmail’e tenbîh eylediğini mevlânâ-yı mûmâ-ileyh mahâllinde ketb ü tahrîr ve ma‘an ba‘s olunan ümenâ-yı şer‘le gelip alâ-vukū‘ihî inhâ ve takrîr eylediği huzûr-ı âlîlerine i‘lâm olundu bâkī fermân men-lehu’l-emrindir. Fî 9 min-Cumâdelâhire sene 1162