Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 224 Hüküm no: 215 Orijinal metin no: [29b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Todori v. Kosta’nın nizama aykırı olarak bakkalında içki sattığından dükkânının kapatılması Ma‘rûz Derûn-ı arzuhâlde mezkûr Ali Paşa-yı Atîk mahallesi civârında vâki‘ el-Hâc Muhyiddin mahallesi imâmı Mehmed Said Efendi b. Abdullah Efendi ve Kemânkeş Kara Mustafa Paşa mahallesi imâmı Süleyman Efendi b. Zeynelabidin ve Mihrimah Sultan Câmi‘-i şerîfi imâmı es-Seyyid Mehmed Efendi b. es-Seyyid Ahmed Efendi ve mahallât-ı mezkûrât ahâlîsinden el-Hâc Ali Odabaşı Ağa b. Mehmed ve Derviş Mehmed b. Mustafa ve es-Seyyid el-Hâc Mehmed Ağa b. Ali ve es-Seyyid el-Hâc Mehmed b. el-Hâc Mustafa ve İsmail Çelebi b. Mustafa ve es-Seyyid Ömer Çelebi b. es-Seyyid Mehmed ve İbrahim Çelebi b. İsmail ve Mustafa b. Şa‘bân ve Abdülkadir Efendi b. el-Hâc Ali ve Osman Odabaşı Ağa b. Mustafa ve Salih Çelebi b. Abdullah ve Salih Ağa b. Süleyman ve Ali Çelebi b. Mehmed ve Ahmed Efendi mahallesi mütemekkinlerinden Todori v. Kosta zimmî muvâcehesinde işbu mesfûr Todori zimmînin hâlâ sâkin olduğu ma‘lûmü’l-hudûd menzilin mâlik-i evveli Bakkāl Nikola nâm zimmî mukaddemâ yedinde mülkü iken menzil-i mezkûrede ihdâs ve küşâde eylediği bakkāl dükkânını bakkālân tâifesi ve pazarbaşıları yedlerinde olan hatt-ı hümâyûn ile mu‘anven emr-i âlîşân mazmûn-ı şerîfi üzere olan nizâmlarına muhâlif olduğunu sâbıkā İstanbul kādısı merhûm Alemî Ahmed Efendi hazretleri huzûrunda iddi‘â ve ber-mûceb-i fermân-ı âlî bakkāl dükkânlığından men‘ olunup ve manav metâ‘ı bey‘inde dahi istikşâf-ı hâl için cânib-i şer‘îden irsâl olunan kâtib dâ‘îleri dükkân-ı mezkûr üzerine varıp ba‘de’t-tefahhus dükkân-ı mezkûr fî-nefsi’l-emr muhdes olup mahalle arasında hâlî mahâlde vâki‘ olmağla merkūm Nikola zimmîden dükkân-ı mezkûrda erâzil-i eşhâsa hufyeten hamr ve arak bey‘ eder olmağla gecelerde eşkıyâ kalıp fesâda müeddî işler ve iyâzen billâhi te‘âlâ ihrâk zuhûru havfından emn ü râhatımız yokdur deyü teşekkî ve dükkân-ı mezkûrun bi’l-külliye ref‘ olunmasını mahalle-i mezkûre imâmı ve etrâfda olan mahallât imâmları ve ahâlîsinden otuz neferden mütecâviz kimesnelerin ihbâ[r] ve ref‘ ve sed olunmasını iltimâslarıyla olan i‘lâm mûcebince dükkân-ı mezkûr sed olunmuşiken hâlâ merkūm Todori mâlik olmağla yine menzili altında bakkāl dükkânı ihdâs eylediği bakkālân yedlerindeki emr-i âlî mazmûnu üzere olan nizâm-ı bakkālâna mugāyir olduğundan mâ‘adâ derûnunda hamr ve arak bey‘inden emniyet ve râhatımız olmamağla ke’l-evvel dükkân-ı mezkûr sed olunmak bâbında fermân-ı âlî ricâsıyla istirhâm eyledikleri Mahkeme-i Bâb’da tescîl ve huzûr-ı âlîlerine i‘lâm olundu fermân men-lehu’l-emrindir. Fî 13 C sene 1162