Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 226 Hüküm no: 217 Orijinal metin no: [29b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sahtiyan satma hakları olmadığı halde satış yapan Dikici Ahmed b. Abdülkerim, Seyyid Yakub b. Osman ve Hacı Mehmed b. Ömer’in sahtiyan satmaktan menedildikleri Bâ-mühr-i hazret-i efendi Ma‘rûz Tâcir esnâfının kethudâları es-Seyyid Osman Çelebi ve yiğitbaşıları el-Hâc Ali ve Çizmecibaşı Osman Çelebi ve Dikicibaşı es-Seyyid İsmail Çelebi ve Arasta Kethudâsı es-Seyyid Ahmed Ağa ve sâir tâcir ve bâzergânlarından el-Hâc İbrahim ve es-Seyyid el-Hâc Ali ve Mehmed Çelebi ve Ahmed Çelebi ve es-Seyyid Mehmed Çelebi ve el-Hâc Ahmed ve el-Hâc Hüseyin Efendi ve Ali Beşe ve Arab el-Hâc Mehmed ve Mustafa Çelebi ve sâir müseccelü’l-esâmî yirmi neferden mütecâviz kimesneler meclis-i şer‘de Mumcu Mehmed Beşe ma‘rifetiyle meclis-i şer‘a ihzâr ettirdikleri Dikici Ahmed b. Abdülkerim ve es-Seyyid Yakub b. Osman ve el-Hâc Mehmed b. Ömer muvâcehelerinde metâ‘ımız olan ecnâs-ı sahtiyân berren ve bahren bâzergân ve debbağān yedleriyle Âsitâne-i sa‘âdet’e geldikde gümrüğü edâ olundukdan sonra doğru tâcirânın Mercan sûkunda vâki‘ lonca yerine getirilip çizmecibaşı ve dikicibaşı ve tâcirler kethudâsı ve yiğitbaşıları ma‘rifetleriyle ba‘de’l-müzâyede tâcir esnâfına tevzî‘ ve taksîm olunup ecânibden kat‘a kimesne müdâhale etmeyip tâcir esnâfı dahi hufyeten bey‘ ve şirâ etmek ve odalarda ve hanlarda vaz‘ olunmak yedimizde olan emr-i âlî ve nizâm-ı kadîmimiz üzere külliyyen memnû‘ iken esnâfımızda alâkası olmayıp ecânibden olan işbu mezbûrûn Ahmed ve es-Seyyid Yakub ve el-Hâc Mehmed esvâkda <> hilâf-ı emr-i âlî ve mugāyir-i nizâm-ı kadîm bey‘ etmeleriyle nizâmımızın ihtilâline bâ‘is olmuşlardır hatta bundan akdem ber-minvâl-i muharrer mezbûr es-Seyyid [30a] Yakub’dan teşekkî eylediğimizde fîmâ-ba‘d sahtiyân bey‘ ve şirâsına müdâhale etmemek üzere tenbîh ve ol dahi ta‘ahhüd edip yedimize i‘lâm-ı şer‘î dahi i‘tâ olunmuşidi deyü min-külli’l-vücûh takrîrlerine mutâbık emr-i âlî ve senedât-ı mer‘iyye ibrâz ile ba‘de’t-teşekkî ve’s-suâl mezbûrûn Ahmed ve es-Seyyid Yakub ve el-Hâc Mehmed ber-minvâl-i muharrer tâcir esnâfından olmadıklarını ve hilâf-ı emr-i âlî ve mugāyir-i nizâm-ı kadîm hufyeten sahtiyân bey‘ eylediklerini ikrâr ve i‘tirâf etmekle mezbûrûn hilâf-ı <> emr-i âlî harekete cesâretleri’çün husûs-ı mezkûra müdâhaleden men‘ ve sâir bu makūle hilâf-ı emr-i âlî cesâret eder olur ise onlar dahi men‘ olunmak bâbında esnâf-ı mezkûrenin emr-i âlîşân istid‘â ve istirhâm eyledikleri ma‘lûm-ı devletleri buyruldukda emr ü fermân hazret-i [men-lehu’l-emrindir] Fî 14 C sene 1162