Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 227 Hüküm no: 219 Orijinal metin no: [30a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çamaşırcı Osman Efendi’nin kiracısı Bogos v. Kazer’den satın aldığı malzemelerin kendisine ait olduğu iddiasıyla Bogos’un oğlu Ariton’un açtığı davanın reddedildiği Ma‘rûz Sahibe-i arzuhâl Ariton nâm zimmî meclis-i şer‘-i hatîrde derûn-ı arzuhâlde mezkûrü’l-ism Câmeşûycu Osman Efendi mahzarında mezbûr Osman Efendi’nin Topkapısı dâhilinde vâki‘ bir bâb dükkânında bi’l-müşâhere müste’ciri olan gāib ani’l-meclis Bogos v. Kazer [nâm] zimmî dükkân-ı mezkûrun icâresini fesheyledikde dükkân-ı mezkûr derûnunda iki aded tekne ve bir kazgan ve bir balta ve ma‘lûmü’l-mikdâr hatabı mülkü olmak üzere ben meclis-i bey‘de hazır ve bey‘a âlim iken işbu mezbûr Osman Efendi’ye on sekiz guruşa bey‘ ve temlîk ol dahi iştirâ ve temellük ve kabz ve kabûl etmişidi ancak eşyâ-i mezkûre mülküm olup babam mesfûr yedinde âriyetim olmağla eşyâ-i mezkûreyi mezbûr Osman Efendi’den taleb ederim deyü olan da‘vâsı takrîr-i meşrûhu üzere sahîha olmamağın hasmı mezbûr Osman Efendi’ye şer‘an suâl dahi teveccüh etmeyip müdde‘î-i mezbûr Ariton zimmî bî-vech mu‘ârazadan men‘ olundu Mahkeme-i Bâb’dan huzûr-ı âlîlerine i‘lâm olundu. Fî 16 Cumâdelâhire sene 1162