Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 228 Hüküm no: 220 Orijinal metin no: [30a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çukadar Ahmed b. Süleyman’ın, Samanveren mahalle çeşmesindeki saka gediğini sattığı Saka Mehmed b. Hüseyin’e açtığı alacak davasının reddedildiği Ma‘rûz Sahib-i arzuhâl Çukadâr Ahmed b. Süleyman meclis-i şer‘-i enverde derûn-ı arzuhâlde mezkûr Saka Mehmed b. Hüseyin muvâcehesinde târih-i i‘lâmdan dokuz sene mukaddem benim İstanbul’da Samanveren mahallesi çeşmesinde olan nısf arka sakası gediğimi sakabaşı ma‘rifetiyle iki yüz elli guruş bedel mukābelesinde mezbûr Saka Mehmed’e ba‘de’l-ferâğ ve’l-kabûl mezbûr Saka Mehmed bedel-i meblağ-ı mezkûrun yüz guruşunu bana edâ ve teslîm ve bâkī yüz elli guruşu zimmetinde kalmağla taleb ederim deyü olan da‘vâsı sahîha olmamağla hasmı mezbûra şer‘an suâl dahi teveccüh etmediğinden mâ‘adâ merkūm Saka Mehmed müdde‘î-i mezbûr Çukadâr Ahmed târih-i ferâğdan yedi sene <> mürûrunda ve târih-i i‘lâmdan iki sene mukaddem zikrolunan saka gediğine ve sâir beynimizde cârî husûsa müte‘allika da‘vâdan herbirimiz âharın zimmetini ibrâ etmişidik deyü olan takrîrini nâtık müdde‘î-i mezbûrun imzâ ve hâtemini hâvî ibrâz eylediği bir kıt‘a temessüğü dahi müdde‘î-i mezbûr Çukadâr Ahmed ikrâr ve i‘tirâf dahi etmeğin mûcebiyle müdde‘î-i mezbûr Çukadâr Ahmed bî-vech-i şer‘î da‘vâ-yı mezkûresiyle mezbûr Saka Mehmed’e mu‘ârazadan men‘ olunduğu Mahkeme-i Bâb’dan huzûr-ı âlîlerine i‘lâm olundu fermân men-lehu’l-emrindir. Fî 17 Cumâdelâhire sene 1162