Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 48 Hüküm no: 9 Orijinal metin no: [4a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Reis Camii imamet ve hitabeti ile Derviş Murad ve Derviş Seyyid Hamza Vakfı’nın zâviyedarlık cihetlerinin Seyyid Hüseyin Halîfe’ye tevcihi Ma‘rûz, Sâdır olan fermân-ı âlîlerine imtisâlen işbu arzuhâl ve derkenâra ba‘de’n-nazar Trabzon sancağında Keşab kazâsına muzâfe Çini nâhiyesine tâbi‘ Hasankeyf karyesine tâbi‘ İbrahim Reis Câmi‘-i şerîfi Vakfı’ndan almak üzere yevmî bir akçe vazîfe ile câmi‘-i mezkûrun imâmet ve hitâbet ve nâhiye-i mezbûreye tâbi‘ Tepe karyesinde vâki‘ Derviş Murad ve Derviş Seyyid Hamza Vakfı’nın vazîfe-i mu‘ayyene ile câmi‘-i mezbûrun imâmet ve hitâbetine meşrûta zâviyedârlık cihetlerine mutasarrıf olan mezbûr es-Seyyid Mehmed pîr-i fânî olup edâ-i hizmetden âciz olduğundan hüsn-i rızâsıyla ehl-i muhtâr-ı cemâ‘at olan dârende-i arz merkūm es-Seyyid Hüseyin Halîfe’ye kasr-ı yed ve atîk beratını meclis-i şer‘de teslîm eylediğini kazâ-i mezbûr ahâlîsinden bu esnâda Der-aliyye’ye gelen bî-garaz erbâb-ı vukūfdan Kaşmiroğlu Mustafa b. Mehmed ve Muslıoğlu el-Hâc Ömer b. Mehmed nâm kimesneler alâ-tarîkı’ş-şehâde ihbâr etmeleriyle bu sûretde cihât-ı mezkûre merkūm es-Seyyid Mehmed’in kasr-ı yedinden mezbûr es-Seyyid Hüseyin Halîfe’ye tevcîh olunmak bâbında emr [ü] fermân hazret-i veliyyü’l-emrindir. Fî-selhi Z sene [12]47