Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 229 Hüküm no: 222 Orijinal metin no: [30b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil b. Hasan’ın, altın yüzük ve gerdanlığını geri vermesi talebiyle Kuyumcu Ariton v. Bartanus’a açtığı davada haksız bulunduğu Ma‘rûz Muhzır Mehmed mübâşeretiyle Bâb Mahkemesi’ne ihzâr-ı şer‘î olunan ku[yu]mcu tâifesinden Ariton v. Bartanus zimmînin hasmı es-Seyyid Halil b. es-Seyyid Hasan meclis-i şer‘de mesfûr Ariton zimmî muvâcehesinde târih-i i‘lâmdan bir ay mukaddem mesfûr Ariton zimmîye füruht eylemek için on beş guruş ve beş para kıymetli bir altın gerdanlık ve üç guruş kıymetli bir altın yüzüğümü vermişidim hâlâ zikrolunan gerdanlık ile yüzük mevcûdlar ise aynılarını müstehlekler ise kıymet-i mezkûresini mesfûrdan taleb ve istirdâd ederim deyü ba‘de’d-da‘vâ ve’l-inkâr müdde‘î-i mezbûr müdde‘âsını beyâna kādir olmayıp mesfûr Ariton zimmî bi’t-taleb ba‘de’t-tahlîfi’ş-şer‘î mûcebiyle müdde‘î-i mezbûr bilâ-beyyine da‘vâ-yı mezkûresiyle mesfûr Ariton zimmîye bî-vech mu‘ârazadan men‘ olunduğu ba‘de’t-tescîl huzûr-ı âlîlerine i‘lâm olundu fermân men-lehu’l-emrindir. Fî 18 min-Cumâdelâhire sene 1162