Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 230 Hüküm no: 224 Orijinal metin no: [30b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anastaş v. Yorgi’nin varisleri olan kızkardeşleri Enice ve Edini’nin mûrislerinin Şerbetçi Dimitri v. Panayot’ta alacağı olduğu iddiasıyla açtıkları davada Dimitri’nin borcunu ödediğini ispat ettiği Ma‘rûz Derûn-ı arzuhâlde mezkûr hâlik Anastaş v. Yorgi v. Tanaş’ın li-ebeveyn kız karındaşları ve hasran vâriseleri olup zâtları Kostandi v. Dimitri ve Zafir v. Simo zimmîler ta‘rîfleriyle mu‘arrefeler olan arzuhâl sahibeleri Enice ve Edini zimmiyeler meclis-i şer‘-i enverde derûn-ı arzuhâlde mezkûrü’l-ism Şerbetçi Dimitri v. Panayot zimmî muvâcehesinde karındaşım hâlik-i mesfûr Anastaş zimmî hayatında ve târih-i i‘lâmdan on sene mukaddem işbu merkūm Şerbetçi Dimitri zimmî malından altı yüz guruş ikrâz ve teslîm ol dahi iktirâz [ve] ahz u kabz ve istihlâk edip meblağ-ı mezbûr ber-vech-i muharrer zimmetinde deyni olduğunu nâtık karındaşım mesfûr yedine bir kıt‘a Rûmî temessük dahi vermeğin karındaşım mesfûr hayatında meblağ-ı mezbûru kable’l-ahz ve’l-istifâ hâlik olup meblağ-ı mezkûr merkūm Şerbetçi Dimitri’nin zimmetinde kalmağla bi’l-verâse taleb ederiz deyü takrîrlerine mutâbık bir kıt‘a Rûmî temessük ibrâz ile ba‘de’d-da‘vâ ve’s-suâl merkūm Şerbetçi Dimitri cevâbında fi’l-vâki‘ kazıyye minvâl-i muharrer üzere olduğunu ikrâr lâkin meblağ-ı mezkûr altı yüz guruşu altın ve beyaz akçe mahlûten hayatında târih-i i‘lâmdan bir buçuk sene mukaddem İstanbul’da Kumkapı dâhilinde Berber es-Seyyid İsmail Çelebi’nin berber dükkânında merkūm Anastaş’a tamamen edâ ve teslîm eylediğimde ol dahi yedimden tamamen ahz u kabz edip ancak meblağ-ı mezkûrun temessüğü yedimden zâyi‘ oldu fîmâ-ba‘d temessük zuhûr eder ise amel olunmaya deyip meblağ-ı mezkûrun mutâlebesine müte‘allika âmme-i da‘vâdan benim zimmetimi ibrâ ve ıskāt edip ben dahi ibrâ-i mezkûru kabûl eyledim deyü ba‘de’d-def‘ ve’l-inkâr merkūm Şerbetçi Dimitri def‘-i meşrûhunu ahrâr-ı ricâl-i ehl-i zimmetden ve Kumkapı dâhili mütemekkinlerinden sandal bezzâzistânı tüccârından Tomas v. Abdullah ve Manav Haçador v. Artin ve Kostandi v. Dimitri ve Zafiri v. Simo nâm zimmîler şehâdetleriyle müdde‘iye[tâ]n-ı mesfûretân Enice ve Edini zimmiyeler muvâcehelerinde vech-i şer‘î üzere ba‘de’l-isbât ve’t-ta‘dîl ve’l-kabûl mûcebiyle hükmolunup müdde‘iyetân-ı mesfûretân Enice ve Edini zimmiyeler da‘vâ-yı mezkûreleriyle mesfûr Şerbetçi Dimitri zimmîye bî-vech-i şer‘î mu‘ârazadan men‘ olunduğu Mahkeme-i Bâb’dan huzûr-ı âlîlerine i‘lâm olundu. Fî 20 C sene 1162